Tirshiligi tynymsyz Almaty jurtynyń tynysy túnge qaraı saıabyrsyǵandaı kóringenimen, qala eshqashan tolyq tynyshtyqqa ketpeıdi. Bireýler úıine asyǵyp barady, bireýler jumystan qaıtady, al bireýler úshin tún - eń jaýapty ýaqyt. Aqshamnews.kz tilshileri Almaty patrúldik polısıasynyń mamandandyrylǵan batalónynda qyzmet etetin aǵa ınspektorlar Danıar Súleımenov jáne Aıan Rysqanovpen birge túngi 01:00-den tańǵy 04:00-ge deıin qala kóshelerin aralap, "uıyqtamaıtyn Almatynyń" tynys-tirshiligin torýyldap qaıttyq.
Túngi 01:00. Reıd neden bastaldy?
Reıd Almatynyń basty arterıalarynyń biri - Ál-Farabı dańǵylynan bastaldy. Túngi qalada kólik qozǵalysy sırek bolǵanymen, tártip buzýshylar da kezdesedi.
Kóp uzamaı Halıýllın kóshesi men Qulja tasjoly qıylysynda oǵash manevr jasap kele jatqan Hyundai Elantra kóligi nazarǵa ilikti. Tekserý barysynda júrgizýshiniń júrgizýshi kýáligi joq ekeni anyqtaldy. Joldyń oń jaq jıegine arnaıy pármen toqtaǵan júrgizýshi óz ýájin aıtty:
"Men kýáligimniń joq ekenin bilmedim. Sebebi zattaı túrde qolymda tur. Byltyr jazda JKO-ǵa túsip, ekinshi kólik ıesimen aýyzsha kelisken edik. Biraq ol keıin syrtymnan aryz jazyp jiberipti… bilmeı qaldym", - dedi ol.
Alaıda patrúl qyzmetkerleri jaǵdaıdyń quqyqtyq jaǵy naqty ekenin túsindirdi: azamat QR ÁQBtK-niń 612-baby 3-tarmaǵyna sáıkes jaýapkershilikke tartylyp, qamaýǵa alynatyny habarlandy. Túngi reıdtiń alǵashqy mınýttary-aq bir nárseni ańǵartty: jolda "kezdeısoqtyq" bolmaıdy - tártip te, talap ta naqty.
02:13. Ál-Farabı - Saıyn qıylysy: zań ǵana emes, kómek te bar
Túngi qalada patrúl jumysy tek toqtatyp-tekserýmen shektelmeıdi. Ál-Farabı - Saıyn qıylysynda apattyq shamyn qosyp toqtap turǵan kólik baıqaldy.
Belgili bolǵandaı, Toyota kóliginiń júrgizýshisiniń janarmaıy taýsylyp, jolda qalyp qoıǵan. Inspektorlar jaǵdaıdy birden túsinip, qaýipsizdikti qamtamasyz etip, júrgizýshige kómektesti. Artynsha kólik ıesi rızashylyǵyn jasyrmady:
"Kóp raqmet. Rıza boldym. Der kezinde baıqap, birden qol ushyn sozdy", - dedi ol.
02:54. Tuman tústi. Qaladaǵy árbir núkte nazarsyz qalmaıdy
Tún ortasynda aýa raıy kúrt ózgerdi. Qalany tuman basa bastady. Mundaıda jol-kólik oqıǵasynyń qaýpi arta túsetini belgili. Inspektorlar bul jaǵdaıdy da nazardan tys qaldyrmady: rasıa arqyly Qulja trassasy mańynda tuman qalyńdaǵanyn eskertip, áriptesterine dereý habarlady.
Kóp uzamaı taǵy bir mańyzdy aqparat tústi: Ál-Farabı dańǵylyndaǵy jaryqtyń óship qalǵany jóninde eskertý jasaldy. Qarapaıym júrgizýshi úshin bul - jaı ǵana "qarańǵylaý" kóshe bolǵanymen, al patrúl úshin bul - qaýipti faktor, aldyn ala áreket etýdi talap etetin belgi.
03:10. Almatyǵa "Sergek" kameralarynyń kózimen qaraǵanda
Inspektorlar bizge jumys barysynda paıdalanatyn "Qorǵaý" qosymshasy jaıly da túsindirdi. Bul júıe arqyly qaladaǵy sergek kameralaryna qoljetimdilik ashylyp, jolda tártip buzǵandardy jedel anyqtaýǵa múmkindik beredi.
Qosymshanyń kómegimen:
- ereje buzǵan júrgizýshiler,
- aıyppuly tólenbegen kólikter,
- qujat merzimi ótip ketken jaǵdaılar
jedel anyqtalyp, ekıpajdarǵa baǵyt-baǵdar beriledi.
Patrúl qyzmetkerleriniń aıtýynsha, jumys kúnderi zań buzýshylyq asa kóp bolmaıdy. Sebebi, qala turǵyndary "erteń jumys" dep kóbine shyrt uıqyǵa ketedi. Al juma–senbi–jeksenbi kúnderi shaqyrtý da, táýekeldi júrgizý de kóbeıedi: jyldamdyqty shamadan tys asyrǵandar, túngi "qatty aıdaý" ádeti, shaqyrtýlar sany artady.
03:37. Áýejaı mańy: óshken baǵdarsham, qolmen rettelgen qozǵalys
Reıdti ári qaraı jalǵastyramyz. Áýejaı mańyn aralaý barysynda Maılın - Buqtyrma kósheleriniń qıylysynda baǵdarshamnyń óship qalǵany baıqaldy. Mundaı jerde bir sáttik abaısyzdyq úlken apatqa aınalýy múmkin.
Patrúl qyzmetkerleri dereý toqtap, jol qozǵalysyn qaýipsizdendirdi. Aǵa leıtenant Aıan Asqaruly kólikter legin qolmen rettep, júrgizýshilerge belgi berip, qıylystaǵy tártipti ýaqytsha óz baqylaýyna aldy.
Túngi qalada jaryq óshse - qozǵalys toqtamaıdy. Sol sátte toqtatatyn da, retteıtin de - osyndaı kezekshi ekıpajdar.
Tańǵy 04:00. "Bizdiń tynyshtyǵymyz - bireýdiń uıqysyz túni"
Saǵat tańǵy tórtke jaqyndaǵanda qala birtindep tynyshtala tústi. Aǵa leıtenant Aıan Asqaruly osy tusta kópshilik elemeıtin tynysh uıqynyń artynda kózge kórinbeıtin eńbektiń baryn aıtty.
"Syrt kózge bizdiń jumys bilinbeýi múmkin. Tańerteń adamdar ádettegi ómirine attanady. Qala tynysh. Al osy tynyshtyqtyń artynda túnimen jumys isteıtin polısıa qyzmetkerleri turǵanyn kóbi baıqamaıdy. Biz túnimen qalanyń tynyshtyǵyn kúzetip, turǵyndardyń beıbit ári tynysh uıqysy úshin qyzmet etemiz. Otbasymyz barynsha túsinedi. Árıne ońaı emes. Bizdiń kúnimiz ben túnimiz aýysyp ketken. Otbasymyzǵa tek demalys kúnderi kóńil bólýge tyrysamyz", - deıdi maman.
Aıta keteıik, jaqynda Prezıdent Qasym-Jomart Toqaev Turkistan gazetine bergen kólemdi suhbatynda qala ákimi Darhan Satybaldyǵa Almatyny Nú-Iork, Máskeý, Parıj sıaqty "eshqashan kóz ilmeıtin qalaǵa" aınaldyrýǵa tapsyrma bergenin aıtqan edi.
Eske salaıyq, buǵan deıin 24/7 jumys isteıtin kitaphana týraly jazǵan edik.
sýretter: Nurbol Yntymaquly