Almaly aýdanynda 27-29 qańtar aralyǵynda qoǵamdyq tártipti saqtaý jáne kóshi-qon zańnamasynyń talaptaryn qamtamasyz etýge baǵyttalǵan jergilikti jedel-profılaktıkalyq is-shara ótkizildi, – dep habarlaıdy Aqshamnews.kz Polisia.kz-ke silteme jasap.
Mundaı aýdandyq tekserýler júıeli túrde júrgizilip, kezeń-kezeńimen qalanyń barlyq aýdanyn qamtıdy. Buǵan deıin osyndaı is-sharalar megapolıstiń ózge de aýdandarynda, onyń ishinde Medeý aýdanynda uıymdastyryldy. Almaly aýdanynda ótken úsh kúndik is-shara barysynda polısıa qyzmetkerleri kóshi-qon zańnamasynyń 141 buzýshylyq deregin anyqtady. Onyń ishinde 21 shetel azamaty Qazaqstan Respýblıkasynyń aýmaǵynan shyǵarylyp, taǵy 25 adam jeke basyn anyqtaý jáne ári qaraıǵy qaraý úshin qabyldaý-taratý ornyna ornalastyryldy. Tekserý nátıjesinde shetel azamattarynyń elde bolý tártibin buzýy, zańsyz eńbek qyzmetimen aınalysýy, sondaı-aq sheteldikterdiń elde zańdy bolýyn qamtamasyz etpegen qabyldaýshy taraptyń jaýapkershiligine qatysty derekter anyqtaldy. Budan bólek, tirkeýsiz jáne qujatsyz turý jaǵdaılary tirkeldi. Atap aıtqanda, tıisti ruqsat qujattarynsyz eńbek qyzmetin júzege asyrǵan shetel azamattarynyń toby anyqtaldy. Jeke basy anyqtalǵannan keıin olar jaýapkershilikke tartylyp, el aýmaǵynan shyǵaryldy. Qazirgi ýaqytta atalǵan tulǵalardy jumysqa tartqan jumys berýshini jaýapkershilikke tartý máselesi qaralýda. Sonymen qatar is-shara aıasynda alımenttik mindettemelerdi oryndaýdan jaltaryp júrgen azamattar da anyqtaldy.
– Aýdandyq jedel-profılaktıkalyq tekserýler — josparly ári kezeń-kezeńimen júrgiziletin júıeli jumys. Biz qalanyń aýdandaryn birtindep qamtyp, kóshi-qon zańnamasynyń buzylýyn anyqtaımyz jáne shetel azamattary men qabyldaýshy taraptyń áreketterine quqyqtyq baǵa beremiz. Negizgi maqsat — tártip ornatý jáne aldyn alý, bul birjolǵy sharalar emes, — dep atap ótti Almaty qalasy polısıa departamenti kóshi-qon qyzmeti basqarmasynyń bastyǵy Erkin Amantaev.