Almaty mýzeıinde Muhtar Áýezov atyndaǵy Qazaq ulttyq drama teatrynyń 100 jyldyǵyna oraı «Ǵasyr jasaǵan Ult teatry» atty kórme saltanatty túrde ashyldy, - dep habarlaıdy Aqshamnews.kz.
Kórmede Almaty mýzeıi men M. Áýezov atyndaǵy Qazaq ulttyq drama teatry mýzeıiniń qorynan alynǵan teatr tarıhyna qatysty biregeı arhıvtik qujattar men fotosýretter, 1940 jyldardan búgingi kúnge deıingi spektákl afıshalary usynyldy.
Ásirese, qazaq teatr óneriniń kórnekti maıtalmandary kıgen sahnalyq kostúmder erekshe nazarda. Atap aıtqanda, A.Moldabekovtiń «Vaná aǵa» spektaklindegi, Sh.Jandarbekovanyń «Aqan seri – Aqtoqty» qoıylymyndaǵy, Z.Sháripovanyń «Otello» spektaklinde Dezdemona rólinde kıgen, sondaı-aq T.Jamanqulovtyń Abylaı han beınesindegi sahnalyq kıimderi jáne basqa da qundy eksponattar kórmege qoıyldy.
Kórmeniń negizgi maqsaty – ǵasyrlyq tarıhy bar ulttyq teatrdyń shyǵarmashylyq jolyn keńinen nasıhattaý, kórermendi qazaq teatr óneriniń damý kezeńderimen tanystyrý jáne jas urpaqtyń rýhanı-mádenı qundylyqtarǵa degen qyzyǵýshylyǵyn arttyrý.
Kórmeniń ashylý rásimine Almaty qalasy Mádenıet basqarmasynyń ókilderi, shyǵarmashylyq ıntellıgensıa, óner qaıratkerleri, buqaralyq aqparat quraldarynyń ókilderi, sondaı-aq qala turǵyndary men qonaqtary qatysty.
Kórme aqpan aıynyń sońyna deıin jalǵasady.