Qazaqstan Respýblıkasy Konstıtýsıalyq Soty tóraǵasynyń orynbasary Baqyt Nurmuhanov Konstıtýsıalyq komısıanyń kezekti otyrysynda jańa Konstıtýsıa jobasyndaǵy sot tóreligi júıesine, jergilikti basqarýǵa jáne Negizgi zańǵa ózgerister engizý tártibine qatysty mańyzdy ózgerister týraly baıandady, - dep habarlaıdy Aqshamnews.kz.
Onyń aıtýynsha, Konstıtýsıanyń segizinshi bólimi – «Sot tóreligi. Prokýratýra. Quqyq qorǵaý tetikteri» aıasynda sot tóreliginiń konstıtýsıalyq qaǵıdattary aıtarlyqtaı kúsheıtilgen. Sot isin júrgizý nysandarynyń qatary artty, sýdıalardyń táýelsizdigi nyǵaıdy. sot júıesiniń kadr máseleleri sheshildi. Sondaı-aq advokatýranyń quqyqtyq mártebesi alǵash ret Konstıtýsıada naqty bekitildi.
«Bul – adam quqyqtary men bostandyqtaryn qorǵaý kepildikterin arttyrýǵa, sondaı-aq qoǵamnyń sot júıesine degen senimin kúsheıtýge baǵyttalǵan mańyzdy qadam», – dep atap ótti Baqyt Nurmuhanov.
Sonymen qatar ol Konstıtýsıanyń jergilikti memlekettik basqarý men ózin-ózi basqarý máselelerine arnalǵan toǵyzynshy bólimi Quryltaıdyń qurylýy jáne elimizde júrgizilip jatqan ákimshilik reformany eskere otyryp qaıta qaralǵanyn aıtty. Birqatar normalar naqtylanyp, memlekettik basqarýdyń jańa jaǵdaılaryna beıimdelgen.
«Bul bólimniń jańartylýy memleket pen qoǵamnyń jergilikti deńgeıdegi ózara is-qımylyn tıimdi etýge degen umtylysty kórsetedi», – dep naqtylady Konstıtýsıalyq Sot tóraǵasynyń orynbasary.
Budan bólek, Baqyt Nurmuhanov Konstıtýsıada jańa, onynshy bólimniń paıda bolǵanyna nazar aýdardy. Bul bólim Negizgi zańǵa ózgerister men tolyqtyrýlar engizý tártibine arnalady. Sondaı-aq ol «Qorytyndy jáne ótpeli erejeler» dep atalatyn on birinshi bólimniń mazmunyna toqtaldy. Atap aıtqanda, budan bylaı Konstıtýsıaǵa ózgerister Prezıdenttiń sheshimimen jáne tek jalpyhalyqtyq referendým arqyly ǵana engiziledi. Sonymen birge referendým ótkizý bastamasyn kóteretin sýbektiler qataryna Halyq Keńesin qosýdy kózdeıtin norma qarastyrylǵan.