Toı kúnin "ádemi dataǵa" josparlaý keıingi jyldary trendke aınaldy. 2026 jyly jup-jubymen keletin, qaıtalanatyn jáne "26" sany bar kúnder kóp. Aqshamnews.kz tilshisi bıylǵa qýanyshyn josparlap júrgen jandarǵa taptyrmaıtyn materıal usynady.
Qys, kóktem, jaz, kúz: qaı mezgilde "ádemi" data kóp?
Qysqy toıdyń atmosferasy erekshe. Al tanymal kúnder tez brondalady. Bul maýsymda eń jıi tańdalatyn datalar: 26.01.2026, 02.02.2026, 14.02.2026, 26.02.2026, sondaı-aq jyldyń aıaǵyndaǵy 12.12.2026 jáne 26.12.2026.
Al kóktem - "jańa bastaý" sımvoly. Juptar kóbine "aınaly" datalardy tańdaıdy: 03.03.2026, 04.04.2026, 05.05.2026, sondaı-aq aıdyń "26" kúnimen keletin 26.03.2026, 26.04.2026, 26.05.2026.
Jaz - naǵyz toıdyń maýsymy. Bul ýaqyt ashyq aspan astyndaǵy toıǵa yńǵaıly bolǵandyqtan, 06.06.2026, 20.06.2026, 22.06.2026, 26.06.2026 jáne 08.08.2026 sekildi datalar aldyn ala josparlaýdy qajet etedi. Tipti qazirden bastap bul datalardy brondap qoıa bergen jón.
Kúzdiń erte kezeńi qýynshty kúnderge jaıly ári fotosessıaǵa kórkem fon beredi. Bul maýsymda jıi tańdalatyndary: 09.09.2026, 10.10.2026, 11.11.2026 jáne aıdyń "26" kúnimen keletin 26.09.2026, 26.10.2026, 26.11.2026.
Durys data tańdaý taǵdyr úshin mańyzdy ma? Nýmerolog keńesi
Mańyzdy kúnder úshin "ádemi" datalarǵa qyzyǵýshylyq jyldan-jylǵa kúsheıip keledi. Qazaqstandyq nýmerolog, astrolog ári psıholog Aısulý Ahımovanyń aıtýynsha, kópshilik bul tańdaýdyń astaryndaǵy mánge úńile bermeıdi.
Mamannyń sózinshe, jurt mundaı datalardy "magıalyq", "mahabbatty kúsheıtetin" nemese "sáttilikti kepildeıtin" kún retinde qabyldaıdy. Biraq ol bul kózqaraspen árdaıym kelise bermeıtinin atap ótti:
"Men mundaı datalarǵa tereńirek qaraımyn jáne árdaıym jappaı entýzıazmdy bólise bermeımin. Negizgi qatelik - aına datanyń ózi avtomat túrde "sátti" degen senim. Óıtkeni mundaı kúnder "baqyt syılamaıdy", tek sol kúnniń ózine tán energıasyn kúsheıtedi. Al ol energıanyń qandaı ekenin kóp adam bilmeıdi, tipti taldaýǵa tyryspaıdy", - deıdi ol.
Sondyqtan maman "moda úshin" emes, jeke úılesim úshin tańdaýǵa shaqyrady: data tańdaǵanda juptyń jeke sandary, jyl men aıdyń astrologıalyq fony jáne psıhologıalyq daıyndyq qatar eskerilýi kerek. Qajet bolsa, "eń ádemi emes" kúnniń ózi otbasy úshin eń turaqty kún bolyp shyǵýy múmkin.
"Keıbir datalar qaýipti bolýy múmkin..."
Buǵan qosa, astrologıalyq faktor da mańyzdy. Nýmerologtyń aıtýynsha, 2026 jyly 22 aqpan "tutylý dálizine" sáıkes keledi. Bul kezeńde taǵdyrǵa qatysty sheshim qabyldaýda qaýip artyp, ıllúzıa, asyǵystyq jáne kútpegen burylystar jıileıdi.
"Psıhologıa turǵysynan bul - adamdardyń jetilgen tańdaýdan góri, mazasyzdyq pen syrtqy qysymnyń áserimen áreket etetin ýaqyty", - dep túsindiredi ol.
Aısulý Ahımova 26.06.2026 kúni týraly bylaı dep túsindiredi:
"Bul datada emosıa tym kúsheıip, qarym-qatynasta “aldymen jarq etý, keıin sýyp qalý” senarıi paıda bolýy múmkin. Al “6” energıasy turmys pen esepti alǵa shyǵaryp, sezimdi "paıdamen ólsheýge" ıtermeleıdi", - deıdi ol.
Maman aına datalarǵa qarsy emesin, biraq taldaýsyz jasalǵan tańdaýdy quptamaıtynyn alǵa tartty.