Búgin Senatta «Ulttyq múdde» dıalog alańynyń «Saıası jańǵyrý: Ádiletti Qazaqstannyń konstıtýsıalyq modeli» taqyrybyna arnalǵan otyrysy ótti, - dep habarlaıdy Aqshamnews.kz.
Kezdesýge qatysýshylar memlekettilikti damytýdyń jańa kezeńine ótý kezinde konstıtýsıalyq reformanyń máni men mazmunyn, onyń saıası júıeni jańǵyrtýdaǵy jáne memlekettik qurylymnyń jańa modelin qalyptastyrýdaǵy rólin talqylady.
Senat Tóraǵasy Máýlen Áshimbaev otyrysqa qatysýshylarǵa iltıpat bildirip, Memleket basshysynyń bastamasymen qolǵa alynǵan aýqymdy konstıtýsıalyq ózgerister memlekettilikti damytýdyń jańa kezeńine ótý úshin jasalǵan qadam jáne qoǵamnyń saıası júıeni jańartýǵa qatysty suranysyna berilgen jaýap ekenin atap ótti. Sondaı-aq ol bul belgili bir salalardaǵy ózgerister emes, memlekettik modeldiń mazmuny men jumys isteý qaǵıdattaryn túbegeıli qaıta qaraý ekenin tilge tıek etti.
«Prezıdentimiz Qasym-Jomart Kemeluly Toqaev Ulttyq quryltaıdyń jýyrda ótken otyrysynda aýqymdy konstıtýsıalyq reformalar týraly aıtty. Memleket basshysy Qazaqstannyń memlekettik qurylysynyń jańa kezeńi bastalatynyn jetkizdi. Bul saıası júıemizge tek túzetýler men tolyqtyrýlar engizý degen sóz emes. Shyn máninde, bul álemdegi qazirgi syn-qaterlerge beıimdelý arqyly túbegeıli jańǵyrýǵa qadam basý ekeni anyq. Sondyqtan, osyndaı mańyzdy sátte birligimizdi bekemdep, Memleket basshysy usynǵan ózgeristerdi júzege asyrýda judyryqtaı jumylý aıryqsha mánge ıe», – dedi Máýlen Áshimbaev.
Palata Spıkeri elimizde júrgizilip jatqan konstıtýsıalyq reforma keshendi jáne júıeli sıpatqa ıe ekenin aıtty. Aldaǵy ózgerister parlamenttik reformalar aıasynan shyǵyp, Ata Zańymyzdy tutastaı qamtyp otyr. Onyń aıtýynsha, qazirdiń ózinde Konstıtýsıanyń 80-ge jýyq normasyna ózgerister enetini belgili boldy. Bul basty quqyqtyq qujatymyzdyń 84 paıyzyn quraıdy. Máýlen Áshimbaev reformanyń mańyzdy baǵyty elimizdiń joǵarǵy zań shyǵarýshy organynyń ókilettikterin keńeıtýdi jáne rólin kúsheıtýdi kózdeıtinin de atap ótti. Sondaı-aq zańnamalyq prosesti ońtaılandyrý, depýtattardyń derbestigin arttyrý, partıalyq júıeni damytý jáne saıası básekelestikti kúsheıtý baǵytyna da basa mán berilip otyrǵanyna toqtaldy.
Senat Tóraǵasy reforma aıasynda memleket pen qoǵam arasyndaǵy kelisim jáne dıalog ınstıtýty retinde Halyq keńesin qurý usynylǵanyna erekshe nazar aýdardy. Otyrysta atalǵan alańda ıdeologıa, qundylyqtar men ulttyq birlik máseleleri talqylanatyny jáne Keńeske zań shyǵarýǵa bastamashy bolý quqyǵyn berý ony mazmundy ınstıtýtqa aınaldyratyny sóz boldy. Usynylǵan ózgeristerdiń qatarynda vıse-prezıdent laýazymyn engizý jáne Konstıtýsıanyń preambýlasyn jańartý týraly bastamalar da bar ekenine mán berildi. Sol arqyly memlekettiliktiń tarıhı sabaqtastyǵyn kórsetip, Ádiletti Qazaqstan qurýdy eń joǵary maqsat retinde belgileý kózdelip otyr.
«Qazaqstan ulttyq jańǵyrý kezeńine qadam basýda. Osy tarıhı sátte zıaly qaýym ókilderi men qoǵamdyq pikir kóshbasshylary erekshe ról atqarady. Qazirgi tańda Memleket basshysy usynǵan aýqymdy ózgeristerdiń mánin qoǵamǵa durys jetkizý asa mańyzdy. Qazirgideı jaýapty kezeńde ulttyq birlikti odan ári bekemdeý óte ózekti. Qoǵamdy ortaq múddege jumyldyrý isinde de sizderge úlken jaýapkershilik júkteledi. Saıası jańǵyýdyń túpki maqsaty – memlekettilik pen Táýelsizdikti nyǵaıtý. Bul – Ádiletti Qazaqstan qurý jolyndaǵy jańa konstıtýsıalyq modelge kóshý kezeńi. Aldaǵy ýaqytta konstıtýsıalyq reformalardy tabysty iske asyrýǵa zıaly qaýym men sarapshylar qoǵamdastyǵy belsendi úles qosady dep senemin», – dedi Máýlen Áshimbaev.
«Ulttyq múdde» dıalog alańynda senatorlarmen birge belgili fılolog, qoǵam qaıratkeri Qoıshyǵara Salǵarauly, L.N.Gýmılev atyndaǵy EUÝ profesory Jamaladen Ibragımov, «El tarıhy» ǵylymı-zertteý ortalyǵynyń dırektory Erlan Saılaýbaı, «Qazaq gazetteri» JSHS-nyń Bas dırektory Dıhan Qamzabekuly, Parlamentarızm ınstıtýty ortalyǵynyń basshysy Sholpan Saımova, Nazarbayev University joǵary memlekettik saıasat mektebiniń dosenti Serik Orazǵalıev jáne basqa sarapshylar sóz sóılep, qozǵalǵan taqyrypqa qatysty pikirlerin bildirdi.
