2026 jylǵy aqpan alǵashqy aptasy jeksenbiden bastalady. Bul aıda qazaqstandyqtardy 20 jumys kúni jáne 8 demalys kúni kútip tur. Merekege baılanysty qosymsha demalys qarastyrylmaǵan – halyq tek senbi men jeksenbide ǵana demalady. Aqpanda taǵy qandaı mańyzdy jańalyqtar men ózgerister bar? Aqshamnews.kz tilshisiniń materıalynan oqyńyz.
Jeke kásipkerler salyq rejımin tańdaıdy
2026 jylǵy 1 naýryzǵa deıin jeńildetilgen deklarasıada qalǵysy keletin jeke kásipkerler salyq organyna habarlama tapsyrýǵa tıis. Eger habarlama berilmese, kásipkerler avtomatty túrde jalpyǵa birdeı salyq rejımine aýystyrylady.
Al 2026 jylǵy 1 qańtarǵa deıin patentpen nemese arnaıy mobıldi qosymsha arqyly jumys istegender ózin-ózi jumyspen qamtyǵandar rejımine óte alady. Bul formatta JK retinde tirkelmeı-aq jumys isteýge bolady. Rejımniń bastalǵan kúni – qosymshada alǵashqy chek qalyptastyrylǵan kún bolyp esepteledi. JK retinde esepten 1 qańtardan bastap óz erkimen shyǵýǵa nemese 1 naýryz 2026 jyly avtomat túrde shyǵýdy kútýge bolady.
Jeńildetilgen rejımniń jańa erejeleri
Buryn bólshek salyq nemese jeńildetilgen deklarasıa qoldanǵan jeke kásipkerler jeńildetilgen rejımde jumysyn jalǵastyra alady, biraq jańa talaptardy eskerý kerek.
Endi tabys shegi 600 000 AEK (shamamen 2 mlrd 595 mln teńge) bolyp belgilendi. Bazalyq mólsherleme 4%, qajet bolǵan jaǵdaıda 2%-ǵa tómendep, ne 6%-ǵa joǵarylaýy múmkin. Osy rejımdi qoldaný úshin 2026 jylǵy 28 aqpanǵa deıin rejımdi qoldaný týraly habarlama berý kerek. Al sharýa jáne fermer qojalyqtary úshin arnaıy rejım qarastyrylǵan. Oǵan kóshý avtomat túrde júzege asady.
Jeńildetilgen salyq rejımimen jumys isteıtin jeke kásipkerler 2025 jyldyń ekinshi jartyjyldyǵy úshin 910-formany 2026 jylǵy 15 aqpanǵa deıin tapsyrýy qajet. Eseptelgen salyqtardy 2026 jylǵy 25 aqpanǵa deıin tóleý kerek.
Bul talap ózgerissiz qalyp, QR jańa Salyq kodeksinde bekitilgen.
QR azamattyǵyna úmitkerlerge emtıhanǵa ótinish qabyldaý bastalady
Qazaqstan azamattyǵyn alýǵa úmitkerl er úshin testileýge ótinish qabyldaý 3–10 aqpan aralyǵynda ótedi. Ótinishti Ulttyq testileý ortalyǵynyń saıtynda berýge bolady. Testileýdiń ózi 11 aqpanda ótedi.
Emtıhan 3 bólimnen turady:
-
qazaq tilinen test,
-
QR Konstıtýsıasynyń negizderi boıynsha test (qazaqsha nemese oryssha),
-
Qazaqstan tarıhynan test (qazaqsha nemese oryssha).
Tapsyrmalarǵa beriletin ýaqyt – 2 saǵat 10 mınýt, test quny – 14 693 teńge.
"Ulttyq qor – balalarǵa": aqpanda úshinshi tólem jasalady
2026 jylǵy 1 aqpanǵa deıin qazaqstandyq balalarǵa "Ulttyq qor – balalarǵa" baǵdarlamasy aıasynda úshinshi ret tólem esepteledi. Bul – 2025 jyl úshin beriletin qarajat. Ony 2025 jylǵy 31 jeltoqsanda 18 jasqa tolmaǵan Qazaqstan azamattarynyń barlyǵy alady.
Tólemniń naqty kólemi ázirge belgisiz: ol balalar sanyna jáne Ulttyq banktiń Ulttyq qordan bólinetin qarajat kólemi týraly derekterine baılanysty bolady. Mysaly, 2024 jyly balalarǵa $100,52, al 2025 jyly $129,38 eseptelgen.
Bul qarajatty maqsatty jınaq shotynan 18 jasqa tolǵan soń ǵana turǵyn úı jaǵdaıyn jaqsartýǵa nemese bilim aqysyn tóleýge paıdalanýǵa bolady.
Birinshi synyp oqýshylary demalady
8 qańtarda mektep oqýshylary úshinshi toqsandy bastap, oqý 10 aptaǵa sozylady. Biraq 1-synyp oqýshylaryna qosymsha demalys beriledi: 2026 jylǵy 9–15 aqpan aralyǵy. Bul 7 kún balalardyń kúsh jınap, oqýyn jalǵastyrýy úshin qajet.
Al jalpy mektep oqýshylary úshin kóktemgi demalys 19–29 naýryz aralyǵynda bolady.
Qańtardaǵy UBT aıaqtalady
Ulttyq biryńǵaı testileý 10 aqpanǵa deıin jalǵasady. Ǵylym jáne joǵary bilim mınıstrliginiń málimetinshe, UBT-ǵa qatysýǵa shamamen 187 myń adam ótinish bergen. Olardyń 75,2%-y emtıhandy qazaq tilinde tapsyrýdy tańdaǵan.
Qazaqstandyq faıter UFC-diń eks-chempıonymen kezdesedi
Qazaqstandyq aralas jekpe-jek sheberi Asý Almabaev UFC-diń jeńil salmaqtaǵy reıtıńi boıynsha 4-oryndaǵy, burynǵy chempıon Brendon Morenomen judyryqtasady. Jekpe-jek 2026 jylǵy 28 aqpanda Meksıkada ótedi.
31 jastaǵy Almabaev qazir reıtıńte 7-orynda. Eger Morenony jeńse, UFC-diń úzdik bestigine kirýge múmkindik alady.
Álem jańalyqtary: qysqy Olımpıada ótedi
XXV Qysqy Olımpıada oıyndary 6–22 aqpan aralyǵynda Italıada – Mılan men Kortına-d’Ampessoda ótedi.
Aldyn ala málimet boıynsha, Qazaqstannan Olımpıadaǵa shamamen 35 sportshy barady. Qazirgi tańda lısenzıa kóp jınalǵan sport túrleri: kónkımen júgirý, short-trek jáne shańǵy jarysy. Sonymen qatar Qazaqstan mánerlep syrǵanaý, frıstaıl, bıatlon, tramplınnen shańǵymen sekirý, shańǵy qossaıysy jáne taý shańǵysy boıynsha da qatysady.
Qazaqstan týyn ashylý saltanatynda short-trek sportshylary Denıs Nıkısha men Iana Han alyp shyǵýy múmkin – olar qazirgi quramdaǵy eń tájirıbeli ári turaqty sportshylardyń biri.
Mınıstrliktiń resmı dereginshe, Qazaqstan quramasyn Olımpıadaǵa daıyndaýǵa shamamen 13,2–13,3 mlrd teńge bólingen. Bul qarjy respýblıkalyq jáne jergilikti búdjetterden, federasıalardan, sondaı-aq týrızm men sport ındýstrıasyn qoldaý qorynan jumsalǵan.