Almaty qalasy Bilim basqarmasy basshysynyń orynbasary Sáken Aralbaev pen Almaly aýdanynyń ákimi Arman Shamshın №95 mektep-lıseıine arnaıy baryp, Global Teacher Prize 2025-2026 halyqaralyq baıqaýynyń qorytyndysy boıynsha álemdegi úzdik 50 muǵalimniń qataryna engen hımıa pániniń muǵalimi Tatána Beloýsovany quttyqtady, - dep habarlaıdy Aqshamnews.kz.
Quttyqtaý is-sharasy Tatána Gennadevna 40 jyldan astam ýaqyt boıy eńbek etip kele jatqan bilim ordasynyń qabyrǵasynda ótti.
«Almatylyq pedagogtyń álemdegi úzdik 50 muǵalimniń qataryna enýi — otandyq bilim berý júıesiniń joǵary deńgeıde ekenin kórsetedi. Tatána Gennadevnanyń kásibı joly mamandyqqa adaldyqtyń jarqyn úlgisi bolyp, áriptesteri men shákirtterine shabyt beredi», — dedi Almaty qalasy Bilim basqarmasynyń ókilderi.
Tatána Beloýsova №95 mektep-lıseıindegi eńbek jolyn 1984 jyly bastaǵan jáne sodan beri osy bilim berý mekemesinde úzdiksiz qyzmet etip keledi. Ustazdyq qyzmeti barysynda ol túlekterdiń birneshe býynyn tárbıelep shyǵardy, zamanaýı bilim berý ádistemelerin belsendi túrde engizip, onlaın platformalar men bilim berý jobalary arqyly keń aýdıtorıaǵa tájirıbesi men bilimin bólisip júr.
Pedagogtyń joǵary bilimi bar, pedagogıka ǵylymdarynyń magıstri, «pedagog-sheber» biliktiligine ıe jáne aǵylshyn tilin erkin meńgergen. Onyń eńbegi birneshe márte memlekettik jáne salalyq marapattarmen baǵalanǵan. 2024 jyly Tatána Beloýsova National Teacher Prize Kazakhstan baıqaýynda jeńimpaz atanyp, «Qazaqstan muǵalimi – 2024» ataǵyn ıelendi.
Tatána Beloýsovanyń Global Teacher Prize baıqaýynyń TOP-50 tizimine enýi №95 mektep-lıseıi úshin ǵana emes, eldegi búkil bilim berý júıesi úshin mańyzdy oqıǵa boldy.
Baıqaý fınalısterin marapattaý rásimi 2026 jyly 1-5 aqpan aralyǵynda Dýbaıda ótetin álemdik bilim berý forýmy aıasynda uıymdastyrylady.