Bir palataly Parlament úlgisi pen memlekettik organdardyń jańartylǵan júıesine arnalǵan erejeler jańa Konstıtýsıa jobasynyń birneshe bólimderine engizildi, - dep habarlaıdy Aqshamnews.kz.
Bul jóninde Konstıtýsıalyq komısıanyń kezekti otyrysyndaǵy sózinde Qazaqstan Respýblıkasy Konstıtýsıalyq Soty Tóraǵasynyń orynbasary Baqyt Nurmuhanov málimdedi. Onyń aıtýynsha, bir palataly Parlament modeline arnalǵan normalar tórtinshi «Quryltaı» degen bólimde jınaqtaldy. Onda zań shyǵarý organynyń ókilettikteri bekitildi, sonymen qatar Quryltaıdyń sesıalaryna jáne onyń qyzmetin uıymdastyrýǵa qatysty baptardyń barlyǵy derlik jańartyldy.
«Zań shyǵarý bastamasy quqyǵyna ıe sýbektilerdiń qatary anyqtaldy. Quryltaı zań qabyldaý arqyly retteletin asa mańyzdy qoǵamdyq qatynastardyń tizbesi berildi. Zań jobalaryn qaraý men qabyldaýdyń rásimderi kózdeldi. Quryltaı Tóraǵasynyń laýazymyna qatysty máseleler jeke bapta retteldi» - dep Baqyt Nurmuhanov atap ótti.
Konstıtýsıa jobasynyń besinshi bólimi «Úkimetke» arnalyp otyr.
«Bir palataly Quryltaıǵa kóshýge baılanysty kóptegen erejeler naqtylandy. Olar Úkimet pen onyń músheleriniń Quryltaı aldyndaǵy jaýaptylyǵy men esep berý, senimsizdik votýmyn bildirý, Quryltaıǵa zań jobalaryn engizý, respýblıkalyq búdjet jáne onyń atqarylýy týraly esep berý máselelerine baılanysty bolyp otyr», - dedi ol.
Baqyt Nurmuhanovtyń sózinshe, altynshy bólim eki baptan turady jáne Qazaqstan Halyq Keńesine qatysty máselelerdi retteıdi.
«Quramyna el azamattary kiretin bul joǵary konsýltatıvtik organ Qazaqstan halqynyń múddesin bildiredi. Onyń Quryltaıǵa zań jobalaryn engizý, respýblıkalyq referendým taǵaıyndaý týraly usynysqa bastama jasaý jáne basqa da mańyzdy ókilettikteri belgilendi», - dep atap ótti.
Jeke, jetinshi bólimde «Konstıtýsıalyq Sotqa» qatysty normalar shoǵyrlandyryldy. Baqyt Nurmuhanov Konstıtýsıalyq Sottyń quramyna, sýdıalardyń ókilettik merzimderine jáne quzyryna qatysty normalar negizinen saqtalǵandyǵyn málimdedi. Osy oraıda Konstıtýsıalyq Sottyń konstıtýsıalyq baqylaý júrgizetin jáne búkil el aýmaǵynda Konstıtýsıanyń ústemdigin qamtamasyz etetin táýelsiz memlekettik organ retindegi mısıasy belgilendi.