Shymkent qalasynda jolaýshysy bar lıft apattyq jaǵdaıda tómenge quldılap, qaýipsizdik júıesiniń arqasynda áreń toqtaǵan, dep habarlaıdy Aqshamnews.kz tilshisi.
Otyrar arnasynyń aqparynsha, oqıǵa Qonaev dańǵylynda ornalasqan elıtaly turǵyn úı kesheninde tirkeldi. Aldyn ala málimet boıynsha, 16 qabatty úıdegi lıft belgisiz sebeptermen 12-qabattan tómen qaraı joǵary jyldamdyqpen qozǵala bastaǵan. Apattyq qaýipsizdik júıesi iske qosylyp, kabına jetinshi qabat deńgeıinde toqtaǵan.
Lıft ishinde bolǵan áıel qutqarýshylardyń kómegimen evakýasıalanyp, jedel medısınalyq járdem brıgadasyna tapsyryldy. Dárigerler onyń taban súıekteri men omyrtqasynan jaraqat alǵanyn anyqtady. Qazirgi tańda naýqastyń jaǵdaıy ortasha aýyr dep baǵalanyp, medısınalyq baqylaýda.
Oqıǵa týraly habarlama «112» qyzmetiniń púltine túsken boıda jedel-qutqarý jasaǵy oqıǵa ornyna jiberilgen. Mamandar lıft shahtasynda qaýipsizdik talaptaryna saı jumystar atqarylǵanyn, alaıda kótergish qurylǵynyń tehnıkalyq jaı-kúıi muqıat tekseriletinin málimdedi.
Áleýmettik jelilerde turǵyndar atalǵan turǵyn úı keshenindegi lıft jabdyǵy buǵan deıin de birneshe ret isten shyqqanyn aıtyp, tehnıkalyq qyzmet kórsetý sapasyna qatysty syn bildirýde. Bul derekter qazirgi ýaqytta tıisti organdar tarapynan tekserilip jatyr.
Atalǵan jaǵdaı boıynsha qaýipsizdik talaptaryna saı kelmeıtin jumystardy oryndaý deregimen qylmystyq is qozǵalyp, oqıǵanyń naqty sebepteri anyqtalýda.