Jańa Ata Zańnyń jobasynda Qazaqstannyń memlekettik uıymdastyrylýyn aıqyndaıtyn, egemendigi men derbestigin nyǵaıtatyn irgeli erejeler qarastyryldy. Bul týraly Konstıtýsıalyq Sot tóraǵasynyń orynbasary Baqyt Nurmuhanov Konstıtýsıalyq komısıanyń kezekti otyrysynda málimdedi, - dep habarlaıdy Aqshamnews.kz.
Ol Konstıtýsıanyń jobasyn tanystyrdy jáne atalǵan erejeler «Konstıtýsıalyq qurylystyń negizderi» atty birinshi bólimge engizilgenin atap ótti.
«Qujatqa sáıkes, Qazaqstan Respýblıkasy – ýnıtarly memleket. Basqarý nysany – prezıdenttik respýblıka dep tujyrymdaldy. Osylaısha buryn birqatar ǵalymdar men mamandardyń basqarý nysanyn naqtylaý qajettigi týraly usynysy júzege asty», – dedi Baqyt Nurmuhanov.
Bul rette Komısıa múshesiniń aıtýynsha, elimizdiń ákimshilik-aýmaqtyq qurylysyn qatardaǵy zańmen emes, konstıtýsıalyq zańmen aıqyndaý usynylǵan.
«Egemendik pen Táýelsizdik, ýnıtarlyq, aýmaqtyq tutastyq, Respýblıkanyń basqarý nysany eshqashan ózgermeıtin qundylyqtar qataryna jatqyzyldy. Bul myzǵymas talap Konstıtýsıanyń alǵashqy normalarynda bekitildi», – dedi Konstıtýsıalyq Sot tóraǵasynyń orynbasary.
Sonymen birge, spıker Komısıanyń keshegi otyrysynda egemendiktiń ıesi – halyq ekenin konstıtýsıalyq deńgeıde bekitý týraly usynys jasalǵanyn eske saldy.
«Bul ıdeıa Konstıtýsıa mátininde kórinis tapty. 4-bapta memlekettik bıliktiń birden-bir bastaýy jáne egemendik ıesi – Qazaqstan halqy, dep shegelenip jazyldy», – dedi Baqyt Nurmuhanov.
Onyń aıtýynsha, Konstıtýsıa mátininde «respýblıkalyq referendým» uǵymy «jalpyhalyqtyq referendým» dep ózgertildi. Budan bólek, halyq bılikti jalpyhalyqtyq referendým jáne erkin saılaý arqyly tikeleı júrgizedi jáne óz bıligin júzege asyrýdy memlekettik organdarǵa beredi, degen norma tujyrymdaldy.