Qazaqstannyń taýly aımaqtarynda qar jamylǵysynyń jınalýy jalǵasyp, keı jerlerde qar kóshkininiń ózdiginen júrý qaýpi saqtalyp otyr, dep habarlaıdy Aqshamnews.kz tilshisi.
Tótenshe jaǵdaılar mınıstrliginiń málimetinshe, turaqsyz aýa raıyna baılanysty eldiń ońtústigi, ońtústik-shyǵysy jáne Shyǵys Qazaqstan oblysynyń bıik taýly aýdandarynda kóshkin qaýpi joǵary. Mamandar tik, qar basqan betkeılerge shyǵýǵa bolmaıtynyn eskertedi.
Jyl basynan beri elimizdiń taýly aımaqtarynda tórt ózdiginen qar kóshkini tirkelgen. Qaýipsizdikti qamtamasyz etý maqsatynda Almaty qalasy men Almaty jáne Shyǵys Qazaqstan oblystarynda jalpy kólemi 4 200 tekshe metrden asatyn 17 profılaktıkalyq kóshkin túsirý jumysy júrgizilgen.
TJM ókilderi azamattardy kóshkin qaýpi jarıalanǵan kezde taýǵa barmaýǵa, aýa raıy boljamyn aldyn ala tekserýge jáne belgilengen soqpaqtarmen ǵana júrýge shaqyrady. Qar mol túsken jaǵdaıda taýǵa shyǵýdy eki-úsh kúnge keıinge qaldyrý usynylady.