Qaraǵandy qalasynda jeke turǵyn úıden iri kólemde urlyq jasaǵan er adam beınebaqylaý kameralaryna túsip qaldy, dep habarlaıdy Aqshamnews.kz tilshisi.
Beınejazbada kúdiktiniń túngi ýaqytta záýlim úıden aqsha men qundy zattar salynǵan aýyr seıfti alyp shyqqany kórinedi. Er adam seıfti qar ústimen domalatyp, birneshe ret toqtap, aınalasyna qarap otyrǵan. Keıin ony qoqys jáshikteriniń janyna jasyryp, tańerteń qaıta kelip alyp ketken. Onyń qozǵalysy birneshe beınebaqylaý kamerasyna jazylǵan.
Úı ıeleri urlyq faktisin birneshe kúnnen keıin, sheteldegi uzaq demalystan oralǵan soń anyqtaǵan. Olar seıftiń joǵalǵanyn baıqap, polısıaǵa júgingen. Aldyn ala málimet boıynsha, keltirilgen shyǵyn kólemi shamamen 10 mıllıon teńge.
Qaraǵandy oblystyq Polısıa departamentiniń habarlaýynsha, jedel-izdestirý sharalary barysynda kúdikti qolǵa túsken. Ol Túrkistan oblysynan Qaraǵandyǵa kelgen 30 jastaǵy er adam. Tekserý kezinde onyń jaldamaly páterinen urlanǵan seıf tabylǵan.
«Seıf zattaı dálel retinde tárkilendi. Kúdikti kinásin moıyndady. Qazirgi ýaqytta sotqa deıingi tergeý júrgizilip, onyń basqa da osyǵan uqsas qylmystarǵa qatysy bar-joǵy tekserilýde», – dep málimdedi polısıa.
Aıta keteıik, buǵan deıin Qaraǵandyda qalta urlyǵyna qatysty taǵy bir beınejazba áleýmettik jelide taraǵan bolatyn. Atalǵan derek boıynsha da kúdikti ustalǵan.