Almatylyqtarǵa qutqarýshylar mamyr merekeleri qarsańynda qaýipsizdik erejelerin eske saldy
Mamyr merekeleri qarsańynda Óńirlik komýnıkasıalar qyzmetiniń alańynda Qazaqstan Respýblıkasy Tótenshe jaǵdaılar mınıstrligi Respýblıkalyq jedel qutqarý jasaǵynyń ókilderi sóz sóılep, turǵyndarǵa tabıǵatta ózin-ózi ustaý erejelerin eske salyp, demalystaryn qaýipsiz ótkizý úshin qalaı áreket etý qajettigi týraly keńesterimen bólisti.
Aýa raıy jylynǵan saıyn dalada demalatyn turǵyndar sany artyp keledi. Bul rette kóptegen adamdar taýly aımaqqa barady, demalystaryn sý qoımalarynyń janynda ótkizedi.
Qutqarýshylar bul kezeńderde taýly aımaqta qar kóshkini qaýpi saqtalatynyn eskertip, osyǵan oraı azamattarǵa taýǵa shyǵýdan bas tartýǵa keńes beredi, dep habarlaıdy Almaty-akshamy.kz.
«Almaty İle Alataýynyń eteginde ornalasqan. Biraz ýaqyt taýǵa shyǵýdan bas tartý kerek, óıtkeni taýda qar kóshkini qaýpi joǵary, sondyqtan saq bolý qajet. Qar kóshkini bolýy múmkin betkeılerge barýdyń keregi joq», - dedi halyqaralyq dárejedegi qutqarýshy, Tótenshe jaǵdaılar mınıstrliginiń ardageri Álıhan Kópjanov.
Taýly aımaqtardaǵy sý qoımalary da qaýipti. Respýblıkalyq jedel qutqarý jasaǵy súńgýir-qutqarý bóliminiń bastyǵy Andreı Bybchenko sýdaǵy qaýipsiz júris-turys erejeleri týraly baıandap berdi.
Sonymen qatar ol «Sýdyń ózi qaýipti element. Munda taý eteginde, ásirese, aǵysy qarqyndy, kólemdi, kúrdeli landshafty jáne tik jaǵalaýlary bar taý ózenderi bar. Eń basty qaýip-qater - ózenderge jaqyndaǵanda salmaǵy 100-500 keliden asatyn alyp tastardy da aǵyzyp áketip jatady», - degen oıymen bólisti.
Al kenelerdiń belsendilik maýsymy dál osy mamyrdyń jyly kúnderine keledi, bul da taý áýesqoılaryna qaýip tóndiredi. Osyǵan baılanysty qutqarýshylar turǵyndarǵa jabyq kıim, kapúshon kıip, jeńi bar kıim men shalbar kıýdi, denede ashyq jer qaldyrmaýǵa keńes beredi.
"Sondaı-aq bir-birińizge kıimderińizde kene bar-joǵyn teksertip alyńyzdar", - deıdi Respýblıkalyq jedel qutqarý jasaǵynyń bas qutqarýshysy Ádilhan Baltabaı myrza.