Mańǵystaý oblysynda Beıneý – Boranqul tasjolynda ıogýrt tıelgen júk kóligi aýdarylyp qaldy. Oqıǵa ornynan túsirilgen vıdeo áleýmettik jelide tarap, jurt nazaryn aýdartty, dep habarlaıdy AqshamNews.kz tilshisi.
Aqparatqa sáıkes, júk kóligi Boranqul aýyly mańyndaǵy 64-razezd aýmaǵynda joldyń kóktaıǵaq bolýyna baılanysty aýdarylǵan. Kýágerlerdiń aıtýynsha, júrgizýshi jaǵdaıdy jergilikti turǵyndarǵa jetkizýdi surap, shashylyp qalǵan ónimdi tegin tarata bastaǵan.
Mańǵystaý oblystyq polısıa departamenti jol-kólik oqıǵasyn rastady. Vedomstvonyń málimetinshe, apat 7 jeltoqsanda saǵat 14:20 shamasynda bolǵan. Tirkemesi bar Scania júk kóliginiń júrgizýshisi taıǵaq jolda rúlge ıe bola almaı, sonyń saldarynan kólik aýdarylyp ketken.
Polısıa habarlaýynsha, oqıǵa saldarynan eshkim zardap shekken joq. Alaıda júrgizýshige ÁQBtK-niń 610-baby boıynsha ákimshilik hattama toltyrylyp, 20 AEK kóleminde, ıaǵnı 78 640 teńge aıyppul salynǵan.
Sonymen qatar taraǵan málimetterge qaraǵanda, shashylǵan «Nejnyı» markaly ıogýrttardy turǵyndarǵa taratý sheshimi júrgizýshi men júk ıesi arasynda kelisilgen bolýy múmkin. Ónim tez buzylatyn sanatqa jatatyndyqtan, qaptamalardyń bir bóligi zaqymdanyp, saqtaý merzimi shekteýli ekeni de aıtyldy.
Polısıa departamenti júrgizýshilerdi qys mezgilinde, ásirese kóktaıǵaq kezinde jolda asa muqıat bolýǵa taǵy da shaqyrdy.