Almatyda Táýelsizdik kúni qarsańynda «Aýyl» partıasy Almaty qalasy fılıaly men «Qazaq analary – dástúrge jol» respýblıkalyq qoǵamdyq birlestiginiń músheleri «Analar taǵylymy – el birliginiń negizi» atty taǵylymdy kezdesý ótkizip, yntymaqtastyq týraly memorandýmǵa qol qoıdy, dep habarlaıdy AqshamNews.kz tilshisi.
2025 jylǵy 15 jeltoqsanda Táýelsizdik kúnine oraı «Analar taǵylymy – el birliginiń negizi» atty mazmundy kezdesý ótti. İs-sharany «Aýyl» partıasy Almaty qalasy fılıaly Almaty oblysy jáne Almaty qalasy boıynsha «Qazaq analary – dástúrge jol» respýblıkalyq qoǵamdyq birlestiginiń múshelerimen birlesip uıymdastyrdy.
Basqosý ulttyq qundylyqtardy ulyqtaý, otbasylyq tárbıe men ananyń qoǵamdaǵy rólin nyǵaıtý, sondaı-aq azamattyq birlikti arttyrý maqsatynda ótti.
Kezdesý barysynda taraptar birlesken áleýmettik, mádenı jáne tárbıelik jobalardy júzege asyrý úshin ózara yntymaqtastyqty damytýǵa kelisti. Nátıjesinde resmı túrde memorandýmǵa qol qoıylyp, onda qoǵamdyq kelisimdi nyǵaıtý, ulttyq salt-dástúrlerdi keńinen nasıhattaý, jas urpaqty otansúıgishtikke tárbıeleý jáne qoǵamdaǵy áıelder men analardyń belsendiligin arttyrý sıaqty ortaq mindetter aıqyndaldy.
İs-sharada «Aýyl» partıasy Almaty qalasy fılıalynyń tóraǵasy Ahmetbek Qońyrbaev sóz sóılep, Táýelsizdiktiń el tarıhyndaǵy mańyzyn atap ótti. Ol ulttyq rýh pen dástúrdi saqtaýda analardyń jáne qoǵamdyq uıymdardyń aıryqsha orny bar ekenin aıtyp, «Qazaq analary – dástúrge jol» birlestiginiń jumysyna joǵary baǵa berdi ári aldaǵy ýaqytta da birlese eńbek etýge daıyn ekenin jetkizdi.
Sonymen qatar partıanyń 25 jyldyq mereıtoıyna oraı qoǵam ómirine belsendi aralasyp, rýhanı-mádenı qundylyqtardy dáripteýge úles qosyp júrgen birqatar azamat saltanatty túrde marapattaldy. Atap aıtqanda, «Qazaq analary – dástúrge jol» RQB tóraıymy Dáýlet Láıle Noǵaıqyzy, QR Prezıdenti janyndaǵy Memlekettik basqarý akademıasynyń Almaty qalasy boıynsha fılıalynyń dırektory Aınur Idrısova, «Egemen Agro» JSHS quryltaıshysy Damır Alımkýlov jáne «Parıtet» JSHS qyzmetkeri Qarlyǵash Saparbekova «Aýyl» partıasynyń 25 jyldyq mereıtoılyq medalimen marapattaldy.