Táýelsizdik kúnine arnalǵan dástúrli ICE SCREAM XII respýblıkalyq pikirsaıys týrnıri bastaldy. 15–16 jeltoqsanyn aralyǵynda ótetin dástúrli pikirsaıys dodasyn Tańdaýly Ekonomıster Odaǵynyń Joǵary Pikirsaıys Mektebi (TEO JPM) uıymdastyryp keledi.
Tańdaýly Ekonomıster Odaǵy búgingi tańda respýblıkamyzdaǵy eń tanymal pikirsaıys mektepteriniń biri retinde jastardyń oılaý qabiletin, kóshbasshylyq daǵdylaryn jáne azamattyq belsendiligin damytýda úlken ról atqaryp keledi. 2004 jyldan beri jumys istep kele jatqan uıym talaı myqty pikirsaıysshyny, qoǵam damýyna úles qosyp júrgen jańa býyn kóshbasshylaryn tárbıeledi. Uıymnyń úzdik jobalarynyn biri osy – uzaq jyldar boıy uıymdastyrylyp kele jatqan ICE SCREAM XII týrnıri.
ICE SCREAM týrnıri – Qazaqstandaǵy eń aýqymdy pikirsaıys dodasynyn biri. Intellektýaldy doda Almaty qalasyndaǵy Narhoz ýnıversıtetiniń qoldaýymen uıymdastyrylady. Bul – eldegi eń belsendi, bilimge qushtar jáne sheshendikke beıim jastar bas qosatyn mańyzdy pikirsaıys alańy. Pikirsaıys – jas talanttardyń ıntellektýaldy áleýetin ashýǵa, oı erkindigin damytýǵa jáne bilimdi, belsendi jastardyń jańa býynyn qalyptastyrýǵa baǵyttalǵan baǵyt.
Bul týrnırdiń nátıjesinde jańa qatysýshylar tartylyp, ýnıversıtet ishinde debat mádenıeti damıdy, akademıalyq ortaǵa qosymsha úles qosylady. Sonymen qatar, ýnıversıtettiń ózindik brendi men ımıjin nyǵaıtady, al qatysýshylar úshin tájirıbe jınaý men daǵdylaryn jetildirý alańy bolyp tabylady.
Ulttyq deńgeıdegi 12 jyldyq dástúr
Týrnır pikirsaıysqa endi qadam basyp, bet burǵan qatysýshylardyń arasyndaǵy doda bolmaq. Oıynnyń ótý formattary kelesideı: Amerıkalyq parlamenttik format (APF) jáne Lınkoln-Dýglas (LD).
Pikirsaıysta qamtylatyn negizgi taqyryptar:
–Halyqaralyq qatynastar jáne qaýipsizdik;
–Turǵyn úı jáne áleýmettik saıasat:
–Ulttyq damý baǵdarlary;
–Ekonomıkalyq modelder.
Bul baǵyttar jas pikirsaıysshylarǵa tereń taldaý jasaýǵa, dáleldi oı aıtýǵa jáne kúrdeli máselelerge jańasha kózqaras qalyptastyrýǵa múmkindik beredi.
Aıta keteıik, bıylǵy dodaǵa 80 komanda, 120-dan astam pikirsaıysshy, 600-ge jýyq kórermen jınalmaq.
Elimizdiń ár óńirinen, aıtalyq, Taraz, Shymkent, Almaty oblysy, Taldyqorǵan, Aqtóbe, Qyzylorda qalalarynan kelgen jas pikirsaıysshylar eki kún boıy aıtys-tartysy mol oı dodasynda baq synaıdy.
TEO CUP XIV týrnıriniń qonaqtary retinde SANA FOUNDATION Qoǵamdyq Qorynyń, SANA BUSINESS ACADEMY tóraǵasy Maqsat Halyq, QR Prezıdenti teleradıokesheni dırektorynyń kómekshisi, ekonomıs, jýrnalıs jáne qoǵam qaıratkeri Erbolat Muhamedjan, QR Qarjy mınıstrligi IMAK kameraldyq baqylaý basqarmasynyń basshysy Erkebulan Nurmahanov syndy belgili tulǵalar qatysady.
Pikirsaıys dodasy jastarǵa jańa ıdeıalarmen bólisýge, ulttyq deńgeıde tájirıbe jınaýǵa, qoǵamdaǵy ózekti máselelerdi talqylaýǵa, sondaı-aq, pikirtalas jáne kóshbasshylyq daǵdylaryn damytýǵa kóp múmkindik beredi.