Qazaqstan Respýblıkasynyń Ulttyq kitaphanasynda mádenı mańyzy zor taǵylymdy shara ótti. Táýelsizdik kúni qarsańynda uıymdastyrylǵan saltanatty rásimde Memlekettik akademıalyq Natalıa Sas atyndaǵy balalar men jasóspirimderge arnalǵan orys teatry óziniń baı tarıhyn qamtyǵan biregeı kitaptardy Ulttyq kitaphana qoryna tabystady. Bul shara bir mezette eki mańyzdy mereıtoıdy toǵystyrdy.
Bıyl – Qazaqstandaǵy tuńǵysh kásibı balalar teatry sanalatyn Teatr Sastyń 80 jyldyǵy, sondaı-aq Ulttyq kitaphananyń 115 jyldyǵy atalyp ótýde. Osy aıtýly kún aıasynda teatr ujymy óz tarıhyn, shyǵarmashylyq jolyn, sahnalyq dástúrin baıandaıtyn arnaıy basylymnyń úsh danasyn ulttyq qorǵa máńgilik saqtaýǵa berdi.
Qazaqstan Respýblıkasynyń Ulttyq kitaphanasynyń dırektory Ǵazıza Nurǵalıeva bul tartýdyń mańyzyn erekshe atap ótti. Onyń aıtýynsha, teatr tarıhyna arnalǵan mundaı basylymdar - tek óner shejiresi ǵana emes, eldiń mádenı jadynyń ajyramas bóligi.
– Bul kitaptar zertteýshilerge, stýdentterge jáne ónersúıer qaýymǵa baǵa jetpes rýhanı qazyna bolmaq. Ulttyq kitaphana úshin osyndaı mádenı murany saqtaý – basty mindetterdiń biri. Barshańyzdy mereıtoımen quttyqtaımyn. Shyǵarmashylyq tabys tileımin. Kitapty ázirleý men ony ulttyq qorǵa tabystaý jolyndaǵy eńbekterińiz úshin zor alǵysymdy bildiremin, – dedi ol.
Sharaǵa Teatr Sastyń tanymal óner ókilderi de qatysyp, teatr tarıhynan syr shertti. Qazaqstannyń eńbek sińirgen ártisi Tatána Tarskaıa men Qazaqstannyń halyq ártisi Olga Korjeva teatrdyń qalyptasý jolyndaǵy qıyndyqtar men shyǵarmashylyq jetistikterge toqtalsa, «Qurmet» ordeniniń ıegeri, akter Mahsat Sahıuly bul kitaptardyń jas urpaq úshin tárbıelik máni zor ekenine toqtala ketti :
– Osydan on bes jyl buryn men de osy kitaphanaǵa jıi keletinmin. Abaıdyń Krylovtan aýdarǵan mysaldaryn dál osy jerden alyp, oqyp, jazyp, daıyndaldym. Óner akademıasyna túsý úshin kitap izdep, óleń, proza, poezıa, túrli mysaldardy osy kitaphanadan taptym. Ol kezde mundaǵy tynyshtyq pen erekshe atmosfera adamnyń boıyna bilim men jaýapkershilikti sińiretin. Bul – búgingi jastar úshin asa qajet dúnıe. Qazir bári sıfrlandyrylǵanymen, kitaphanadaǵy rýhanı orta eshqashan óz mańyzyn joǵaltpaıdy, – dedi akter.
Kitaptardyń Ulttyq kitaphana qoryna tapsyrylýy – óner men bilimniń, sahna men kitaphananyń ózara úndestigin kórsetken sımvoldyq sátke aınaldy. Bul bastama urpaqtar sabaqtastyǵyn saqtap, mádenı murany keler býynǵa aman jetkizýge baǵyttalǵan mańyzdy qadam ekeni anyq.
Aıta ketý kerek, atalǵan kitaptar endi Ulttyq kitaphananyń sırek qorynda saqtalyp, teatr tarıhyna qyzyǵýshylyq tanytqan barsha oqyrman men zertteýshige qoljetimdi bolady.