Kólik mınıstrligi aqyly joldarda tólem jasaý tártibin jańartýdy josparlap otyr. Jańa ózgerister júrgizýshilerge tólemdi ýaqytynda óteýge kóbirek múmkindik berip, aıyppulǵa iligý qaýpin azaıtýdy kózdeıdi, dep habarlaıdy AqshamNews.kz tilshisi.
Kólik mınıstrliginiń habarlaýynsha, qazir qoldanystaǵy ereje boıynsha júrgizýshi aqyly jol aqysyn 7 kúntizbelik kún ishinde tólemese, 8-kúni materıaldar ÁQBtK talaptaryna saı kólik baqylaý organdaryna joldanady.
Aldaǵy ýaqytta bul tártip jeńildetiledi: endi jeke tulǵalarǵa tólem jasaýǵa 30 kúntizbelik kún beriledi. Eger jolaqy paıdalanǵan kúnnen bastap 30 kún ishinde tólenbese, materıaldar 31-kúni kólik baqylaý organdaryna jiberilmek.
Sonymen qatar jańa erejede zańdy tulǵalar úshin bólek mehanızm engiziledi. Eger zańdy tulǵa eseptik kezeń aıaqtalǵannan keıingi aıdyń 20-syna deıin tólem jasamasa, materıaldar kelesi kúni kólik baqylaý organdaryna joldanady.
Mınıstrlik bul ózgerister tólem prosesin barynsha yńǵaıly ári túsinikti etip, tólem merzimin ulǵaıtýǵa jáne obektıvti sebeptermen keshikken jaǵdaıda ákimshilik jaýapkershilikke tartylý táýekelin tómendetýge baǵyttalǵanyn atap ótti.