Almatyda jańa jyldyq merekeler qarsańynda pırotehnıkany paıdalanatyndarǵa baqylaý kúsheıdi. Jyl saıyn mereke kúnderi qalada orta eseppen 13 órt tirkeledi, onyń shamamen 15%-y salút pen petardadan shyǵady eken.
Óńirlik komýnıkasıalar qyzmetinde ótken baspasóz konferensıasynda Almaty qalasy Tótenshe jaǵdaılar departamentiniń Memlekettik órt baqylaý basqarmasynyń bas mamany Rýslan Qasenov osylaı dedi. Ol merekeniń arty jaraqat alyp, órtke ulasyp ketpes úshin qala turǵyndaryn qaýipsizdik talaptaryn qatań saqtaýǵa shaqyrdy.
Spıkerdiń aıtýynsha, pırotehnıkalyq buıymdardy qoldanǵanda shyǵatyn órt pen jaraqat alý jaǵy abaısyzdyq pen qarapaıym qaýipsizdik talabyn saqtamaýdan bolady. Sońǵy bes jylda Almatyda jańa jyldyq kezeńde 68 órt tirkelse, sonyń 10-y pırotehnıkany qoldanǵan kezde bolypty.
Órt pen oqys jaǵdaıdyń aldyn alý maqsatynda Almatynyń Tótenshe jaǵdaılar departamenti jyl saıyn aldyn-alatyn is-sharalardy ótkizedi. Qazir jappaı jańa jyldyq naýqan ótetin barlyq oryndar týraly aqparat qolda bar, aýdandyq tótenshe jaǵdaılar basqarmalarymen birlesip osy nysandarda órt qaýipsizdigi men tehnıkasyna tekserý uıymdastyrylyp jatyr. Sonymen qatar Polısıa departamentimen birlesip «Pırotehnıka» jedel-profılaktıkalyq is-sharasyn ótkizý jospary da bekitildi.
«2025 jylǵy 5 jeltoqsannan 2026 jylǵy 3 qańtarǵa deıin ruqsatsyz saýda men qaýipti ónimderdi anyqtaý maqsatynda pırotehnıkalyq ónimderdi saqtap, satatyn oryndarǵa reıd júrgizile bastady. Qazirdiń ózinde Jetisý men Medeý aýdanynda osyndaı reıdter ótti», – dep atap ótti Rýslan Qasenov.
Sonymen qatar TJD qyzmetkerleri pırotehnıka satatyndarmen profılaktıkalyq jumys júrgizdi: 120 túsindirme jumysy ótip, sonyń barysynda buıymdardy saqtaý men paıdalaný kezindegi órt qaýipsizdigi talaptary túsindirildi. Halyqty aqparattandyrý úshin qala medıabordtarynda, saýda úıleriniń LED-ekrandarynda, emhanalarda, HQKO-larda jáne basqa da kópshilik oryndarda beınerolıkterdiń kórsetilimi uıymdastyryldy. Almatynyń barlyq mektebi men balabaqshasynda balalarǵa pırotehnıkany qaýipsiz qoldaný erejesin úıretýge baǵyttalǵan synyp saǵaty men sabaqtar ótip jatyr.
Qala turǵyndary men qonaqtaryna pırotehnıkalyq buıymdardy tek mamandandyrylǵan dúkenderden satyp alyp, qaptamasynyń bútindigi men jaramdylyq merzimine nazar aýdarý qajettigi eskertildi. Pırotehnıkany jylý men ylǵaldan aýlaqtaý jerde saqtaý qajet. İske qosar kezde 16 jasqa tolmaǵan balalardy aýlaq ustap, buıymnyń ústinen tónip qaraýǵa, qatty jel kezinde ushyryp, janbaı qalǵan bilteni qaıta jaǵýǵa qatań tyıym salynady. Feıerverk atatyn jer turǵyn úıden kemi 50 metr alystaý bolýy tıis, jaqyn mańda aǵash, elektr berý jelisi men basqa da kedergi bolmaýy kerek.
Jańa jyldyq shyrshalardy ornatý kezindegi órt qaýipsizdigine de erekshe kóńil bólindi. Shyrsha ornyqty tuǵyrǵa ornatylyp, evakýasıalaıtyn joldy jappaýy tıis, butaqtary da qabyrǵalar men tóbeden keminde bir metr qashyqtyqta ornalasýy qajet. Shamdardy qospas buryn elektr jelisine túsetin júktemeni eseptep alý kerek, symdary qyzyp nemese ushqyn paıda bolǵan jaǵdaıda ılúmınasıany dereý ajyratyp tastaý qajet.
Almaty qalasy Tótenshe jaǵdaılar departamenti Memlekettik órt baqylaý basqarmasynyń aǵa ınjeneri Jandar Dýlattyń aıtýynsha:
«Jańa jyldyq is-sharalardy kópshilik oryndarda ótkizý kezinde keminde eki evakýasıalyq shyǵý joly bar jáne olar únemi ashyq turatyn úı-jaılardy ǵana paıdalanýǵa ruqsat etiledi. Úı-jaılar alǵashqy órt sóndirý quraldarymen qamtamasyz etilip, jaýapty tulǵalar órt qaýipsizdigi boıynsha nusqaýlyqtan ótýi tıis. Terezelerinde torlary bar zaldarda is-shara ótkizýge, qatarlar arasyndaǵy ótkelderdi taryltýǵa, qoıylym kezinde jaryqty tolyq óshirip, sondaı-aq qoldan jasalǵan gırlándalar men elektr qondyrǵylaryn paıdalanýǵa tyıym salynady», – dep atap ótti.
Búgingi tańda polısıa qyzmetkerlerimen birlesip reıdter ótkizildi, QR ÁQBtK-niń 196-baby boıynsha 10 ákimshilik hattama toltyryldy, zańsyz satylǵan pırotehnıkalyq ónimder tárkilenip, onyń bir bóligi belgilengen tártippen mórlendi. Qutqarýshylar qarapaıym qaýipsizdik erejesin saqtaý Jańa jyldy oqys oqıǵasyz ótkizip, qarsy alýǵa múmkindik beretinin aıtady.