Almatyda 2025 jylǵy qurylys maýsymynyń qorytyndysy boıynsha ınjenerlik-kommýnıkasıalyq ınfraqurylym jobalaryn júzege asyrý kezinde zańbuzýshylyqtarǵa jol bergen birqatar merdiger uıymny lısenzıasy alyndy. Bul týraly Almaty qalasy ákiminiń orynbasary Almasqan Smatlaev Almatynda ótken brıfıń barysynda málimdedi.
Onyń aıtýynsha, lısenzıa jumys kezinde talaptardyń júıeli túrde buzylýyna jol bergen kompanıalardan alyndy. Olardyń qatarynda «AsiaMax» JSHS, «SK 7 Stroı» JSHS, «Enerdjı-Taraz» JSHS, «Alataý sapa qurylys» JSHS bar.
«Júıeli tekserister men jospardan tys baqylaýlar nátıjesinde sapa men normatıvtik talaptardyń saqtalýyn qamtamasyz etpeıtin kompanıalardyń qala jobalarynda jumys isteýge quqyǵy joq degen qatań sheshim qabyldandy», — dedi spıker.
Almasqan Smatlaevtyń aıtýynsha, jaýapsyz merdigerlerge qatysty 30 talap-aryz daıyndalyp, sot oryndaryna joldanǵan. Sonymen qatar, jobalaý uıymdary men avtorlyq qadaǵalaý organdaryna qatysty da talap-aryz jumystary júrgizilýde, onyń ishinde ınjenerlik jeliler men abattandyrý elementterinde jobalyq sheshimderdiń durys ornalaspaý faktileri bar.
Ákim orynbasary anyqtalǵan zańbuzýshylyqtarǵa baılanysty jumystardy kelisý tártibi ózgertilgenin atap ótti.
«Endigi kezekte barlyq kelisim tek qalanyń basqarmalarynyń qatysýymen júrgiziledi. Bul baqylaýdy kúsheıtip, barlyq qatysýshylardyń jaýapkershiligin arttyrady», — dedi Almasqan Smatlaev.
Sondaı-aq spıker merdiger jáne jobalyq uıymdarǵa normatıvtik talaptardy, jumys júrgizý erejelerin jáne kelisý rásimderin múltiksiz saqtaýdyń mańyzyn eskertti. Tıisti ruqsatsyz nemese belgilengen normalardy buza otyryp júrgizilgen jumystar qatań ákimshilik sharalar arqyly toqtatylady.
«Bul aıyppuldar, qyzmetti toqtatý, keltirilgen shyǵyndy óteý, kelisim-sharttardy buzý jáne lısenzıadan aıyrýǵa deıin jetýi múmkin», — dedi ákimniń orynbasary.
Almasqan Smatlaevtyń aıtýynsha, qoldanylatyn sharalar 2026 jyly josparlanǵan qalalyq jobalardy sapaly ári merziminde júzege asyra alatyn myqty ári senimdi merdigerler tobyn qalyptastyrýǵa baǵyttalǵan.