Almatyda «Shyǵys qaqpasy» jáne «Batys» polıortalyqtarynyń jobalaryn ázirleýge arnalǵan halyqaralyq sáýlet baıqaýy jeńimpazdaryn marapattaý rásimi ótti.
Baıqaýdy qala ákimdigi «SHARE Architects» sáýlet qaýymdastyǵymen birlesip uıymdastyrdy. Bolashaq polıortalyqtardyń jobalaryn Fransıa, Shveısarıa, Ispanıa, Germanıa, Anglıa, AQSH, Sıngapýr jáne basqa da elderdiń 15 halyqaralyq kompanıasy usyndy.
İs-sharaǵa qatysýshylar men qonaqtarǵa arnaǵan quttyqtaý sózinde Almaty qalasy ákiminiń orynbasary Beıbit Shahanov bul baıqaýdyń qala úshin mańyzdylyǵyn atap ótti. Onyń aıtýynsha, bul baıqaý Almatyny polıortalyqty damý modeline kóshirý jolyndaǵy mańyzdy qadam.
"Halyqaralyq qazylar alqasynyń qaraýyna joǵary deńgeıde ázirlengen, tyń ári jan-jaqty ázirlengen jobalar usynyldy. Olardyń árqaısysy Almatynyń 2040 jylǵa deıingi Bas josparyna negizdelgen strategıalyq mindetterdi jańa qyrynan paıymdaýǵa ózindik úles qosty. Qalamyz taý landshaftyn úılestirý men ozyq jasyl tehnologıalardy engizý arqyly turǵyndar úshin barynsha jaıly orta qalyptastyrýǵa umtylady. Biz shyǵarmashylyq jáne ınjenerlik áleýetti toǵystyratyn aımaqtyq habqa aınalýǵan nıettimiz. Bul jolda úzdik halyqaralyq komandalardy tartý – basty basymdyqtardyń biri. Sizderdiń ıdeıalaryńyz ben tájirıbelerińiz Almatynyń erteńgi kelbetin qalyptastyrýǵa búginnen bastap úles qosyp otyr", – dedi Almaty qalasy ákiminiń orynbasary Beıbit Shahanov.
Germanıadan kelgen qazylar alqasynyń múshesi Roland Behman qalanyń damý áleýeti joǵary ekenin atap ótti. Onyń pikirinshe, Almaty shyǵys mádenı murasy men zamanaýı qala qurylysy úrdisterin ushtastyra otyryp damýǵa qabiletti. Sondaı-aq ol baıqaýǵa qatysýshylar usynǵan jumystar qalanyń ornyqty ınfraqurylym men jaıly jasyl orta qalyptastyrýǵa baǵyttalǵan damý baǵytyna tolyq saı keletinin aıtty.
Baıqaý qorytyndysy boıynsha jeńimpazdar anyqtaldy:
«Shyǵys qaqpa» polıortalyǵy nomınasıasynda — ENOTA (Slovenıa);
«Batys» polıortalyǵy nomınasıasynda — LDA Design sáýlet búrosy (Ulybrıtanıa).
«Bizdiń joba jaıaý júrý ómir saltyn damytýǵa, sondaı-aq qoǵamdyq kólikpen jaıly ári qolaıly qozǵalysty qamtamasyz etýge baǵyttalǵan. Turǵyn úı, komersıalyq nysandar, úlken saıabaq jáne áleýmettik ınfraqurylym — biz olardyń arasyndaǵy tepe-teńdikti tabýǵa tyrystyq. Iaǵnı, «15 mınýttyq qala» tujyrymdamasy aıasynda adamǵa qajetti negizgi qyzmetterdiń barlyǵy jaıaý barýǵa bolatyndaı jerde bolady», - dedi LDA Design kompanıasynyń ókili Evgenıı Dıdorenko.
Aıta keteıik, Almatyda 5 polıortalyq qurý josparlanǵan: «Soltústik», «Batys», «Ońtústik-batys», «Shyǵys qaqpa» jáne «Tarıhı ortalyq». Bul bastama ekonomıkalyq belsendilikti teń bólýge, kólik júktemesin azaıtýǵa jáne qalalyq ınfraqurylymnyń qoljetimdiligin arttyrýǵa múmkindik beredi.