2025 jylǵy 12 jeltoqsanda Almaty qalasy Bilim basqarmasynyń «№187 jalpy bilim beretin mektep» KMM-de kórnekti aqyn, jazýshy, QR mádenıet salasynyń maıtalmany Sáýle Dosjannyń «Bala shaqtan – bolashaqqa» atty jańa ǵumyrnamalyq-tanymdyq povesiniń saltanatty tanystyrylymy ótti.
Shyǵarma – elimizdiń Prezıdenti Qasym-Jomart Kemeluly Toqaevtyń balalyq kezeńi men tulǵa bolyp qalyptasý jolyna arnalǵan.
İs-sharada Memleket basshysynyń ult kóshbasshysy deńgeıine deıingi dara jolyna áser etken otbasy tárbıesi, rýhanı qundylyqtary men adamdyq ustanymdary týraly taǵylymdy oılar talqylandy.
Sondaı-aq qazaq detektıv janrynyń negizin qalaǵan Kemel Toqaevtyń ulaǵatty tárbıesi men ónegesi týraly erekshe pikirler aıtyldy. İs-sharaǵa tanymal qalamgerler, mektep parlamentiniń ókilderi men aǵa tálimgerler jáne ata-analar qaýymy qatysty.
Oqýshylar avtor Sáýle Dosjanmen erkin formatta suhbat quryp, Prezıdenttiń balalyq shaǵynan alynǵan ómirlik sabaqtar men shyǵarmanyń tárbıelik mazmunyn talqylady. Sonymen qatar jas býynnyń ádebıetke qyzyǵýshylyǵyn arttyrýǵa arnalǵan arnaıy dıalog alańy uıymdastyryldy.
Shara jas urpaqty otansúıgishtikke, tabandylyqqa, bilimge qushtarlyqqa jáne azamattyq jaýapkershilikke baýlýdy maqsat etti. Poves arqyly oqýshylar árbir úlken jetistiktiń túp tamyry bala kúnnen bastalatyn eńbek, ynta jáne adaldyq ekenin sezindi.