Úkimettiń 2025 jylǵy jumysynyń qorytyndysyn shyǵarý boıynsha Astana Hub-ta ótken baspasóz konferensıasynda energetıka mınıstri Erlan Aqkenjenov jylytý maýsymyn ótkizý boıynsha júrgizilip jatqan jumystar týraly aıtty, dep habarlaıdy aqshamnews.kz Úkimet baspasózine silteme jasap.
Esepti kezeńde energetıka salasynda eń mańyzdy nátıjelerge qol jetkizildi – ınfraqurylymnyń uzaq jyldar boıy sozylǵan tozýy toqtatylyp, aktıvterdi aýqymdy jańartý sıkli iske qosyldy. «Tarıfti ınvestısıaǵa aıyrbastaý» qaǵıdaty engizilgennen keıin elektr stansalaryn jóndeý jumystaryna salynǵan kapıtaldyq ınvestısıalar 20%-ǵa artty, bul engizilgen prınsıptiń tıimdiligin kórsetedi.
Atqarylǵan jumystardyń nátıjesi senimdiliktiń naqty kórsetkishterimen baǵalanady. Uzaq jyldan beri alǵash ret el boıynsha JEO (jylý elektr ortalyqtary) jabdyqtarynyń jalpy tozýy azaıyp, kórsetkish 61%-ǵa jetti. Josparlanǵan barlyq jóndeý jumysyn oryndaý Kentaý, Rıdder jáne Ekibastuz stansalary sekildi barlyǵy 9 energetıkalyq nysandy táýekel aımaǵynan shyǵarýǵa múmkindik berdi.
323 shaqyrymdyq jylý jelilerin qaıta jańǵyrtý nátıjesinde tutynýshylarǵa turaqty jylý jetkizý qamtamasyz etilip, ınfraqurylymnyń tozýy 52%-ǵa tómendedi. Jylý jelilerindegi apattyq jaǵdaılar sany 25%-ǵa kemidi.
«Infraqurylymdy qalpyna keltirýmen qatar jańa qýat kózderin iske qosý jumystary qarqyndy túrde júrgizilýde. 2025 jyly Tekeli energetıkalyq kesheninde gazotýrbınalyq qondyrǵylar paıdalanýǵa berildi, al Topar MAES-inde (memlekettik aımaqtyq elektrostansa) 130 megavatt qýattylyǵy bar jańa týrboagregat sátti iske qosyldy. Energetıkalyq júıe suranystyń aldyn orap, rekordtyq kórsetkish saǵatyna 118 mlrd kılovatt elektr energıasyn óndirdi», — dedi Erlan Aqkenjenov.
Kelesi jyldan bastap Úkimet óńirlik deńgeıde jylýmen jabdyqtaý sqemalaryn qaıta qaraý boıynsha júıeli jumysqa kirisedi. Pılottyq jobalar Jambyl oblysy men Shymkent qalasynda júzege aspaq.