Almatyda kámeletke tolmaǵandar jasaǵan asa aýyr qylmystyń sany 40%-ǵa, balalarǵa qarsy qylmys 10,2%-ǵa tómendegen. Óńirlik komýnıkasıalar qyzmetinde ótken baspasóz konferensıasynda Almaty qalasy Polısıa departamenti qoǵamdyq qaýipsizdik basqarmasynyń ıývenaldyq polısıa bóliminiń bastyǵy Janna Shonjanova osylaı dep málimdedi.
Onyń aıtýynsha, polısıanyń júıeli jumysy Memleket basshysy aıqyndaǵan «Zań jáne tártip» qaǵıdatyna sáıkes qurylyp, İİM júıesinde jarıalanǵan Profılaktıka jyly aıasynda júrgizilip jatyr. Sondaı-aq kámeletke tolmaǵandarǵa jasalatyn zorlyq ta 4,6%-ǵa deıin azaıypty.
Aldyn-alýdy kúsheıtip, qaýip-qaterdi erte anyqtap, mekemearalyq ózara is-qımyldyń belsendi bolýynyń arqasynda osyndaı nátıjege qol jetken. Almatyda memlekettik organdarmen, qoǵamdyq uıymdarmen, buqaralyq aqparat quraldarymen birlesip 11 jalpyqalalyq jedel-profılaktıkalyq is-shara ótkizilip, 22 myńnan astam ákimshilik quqyq buzýshylyq anyqtalǵan.
Nysanaly profılaktıka aıasynda ishki ister organdarynda 567 jasóspirim men 503 qolaısyz otbasy esepke alyndy. Qıyn jaǵdaıǵa tap bolǵan balalardy qoldaý ortalyqtaryna kámeletke tolmaǵan 843 bala jiberilip, olarǵa qajetti áleýmettik jáne psıhologıalyq kómek kórsetilip jatyr.
Ata-analardyń jaýapkershiligine erekshe nazar aýdaryldy. Balalary túngi ýaqytta zań ókilderinsiz júrgeni úshin 10 myńnan astam ata-ana ákimshilik jaýapkershilikke tartyldy. Janna Shonjanovanyń atap ótýinshe, bul jazalaý emes, profılaktıkanyń mańyzdy elementi, balalardyń qaýipsizdigi úshin eresekterdiń jaýap beretinin qaperine salyp otyrýdyń amaly.
Kámeletke tolmaǵandar isteri men olardyń quqyqtaryn qorǵaý jónindegi mekemearalyq komısıalardyń jumysy da jalǵasty. Esepti kezeńde 472 materıal qaraldy. Nátıjesinde 37 ata-ana ata-analyq quqyǵynan aıyrylyp, balalarǵa durys tárbıe bermegeni úshin taǵy 2 871 ata-ana ákimshilik jaýapkershilikke tartyldy. Sot sheshimimen 23 jasóspirim devıantty minez-qulqy bar balalarǵa arnalǵan arnaýly bilim berý uıymdaryna jiberildi.
Janna Shonjanova búı dep aıaqtady sózin:
«Kámeletke tolmaǵandar arasyndaǵy quqyq buzýshylyqtyń aldyn alý – polısıanyń, otbasynyń, mektep pen qoǵamnyń ortaq mindeti. Almatynyń ıývenaldyq polısıasy balalardyń quqyqtaryn qorǵaýǵa, quqyq buzýshylyqtyń aldyn alyp, óskeleń urpaq úshin qaýipsiz orta qalyptastyrýǵa baǵyttalǵan júıeli jumysty jalǵastyra beredi».