Oqushylar saraıynyń úlken kontsert zalynda belgílí memleket jáne qoǵam qaıratkerí Kákímbek Salyqovtyń ómírí men qyzmetíne arnalǵan taǵylymdy kesh óttí. Jıyndy Medeu audanynyń ákímdígí, «AMANAT» partıyasy, bírqatar múddelí ūıymdar men «Jas ūrpaq» aqparattyq-aǵartushylyq, patrıottyq ortalyǵy ūıymdastyrdy.
«Jas ūrpaq» aqparattyq-bílím beru patrıottyq ortalyǵy ūıymdastyryp otyrǵan jıynǵa belgílí ǵalym-ádebıettanushy, fılologıya ǵylymdarynyń kandıdaty, Almaty qalasy ákím apparatynyń Ádep jóníndegí uákílí Mamaı Ahetov, Memlekettík jáne jergílíktí basqaru ınstıtutynyń rektory, professor, «Máslıhat jáne ákímdík» jurnalynyń bas redaktory Ábken Toqtybekov, Abaı atyndaǵy Qazaq ūlttyq pedagogıkalyq unıversıtetíníń Ardagerler keńesíníń tóraǵasy Beríkjan Aıtqūlūly, Medeu audany Ardagerler keńesíníń tóraǵasy Almas Tíleubaev, «AMANAT» partıyasy Almaty qalalyq fılıaly tóraǵasynyń orynbasary Quanysh Telepov qatysty.
Basqosudy «Jas ūrpaq» ortalyǵynyń tóraǵasy Bahtıyar Kamalūly ashyp, júrgízíp otyrdy.
Jalpy, atalmysh basqosu osymen besínshí márte ótíp otyr. Būl otyrystyń basty maqsaty – oqushy jastardy kórnektí tūlǵalardy táuelsíz Qazaqstannyń qalyptasuy men damuyna qosqan úlesímen tanystyryp, jas ūrpaqtyń boıynda patrıotızm sezímín, azamattyq jauapkershílíktí jáne elímízdíń tarıhı mūrasyna degen qūrmettí qalyptastyru.
«Jas ūrpaq» aqparattyq-aǵartushylyq, patrıottyq ortalyǵy memleket damuyna eleulí úles qosqan qoǵam qaıratkerleríníń ómír joly men qoǵamdyq qyzmetín nasıhattau, sondaı-aq oqushy jastar arasynda ornyqty ruhanı-adamgershílík qūndylyqtardy qalyptastyru baǵytyndaǵy jūmystardy jalǵastyra beretín bolady. Būl rette Bahtıyar Kamalov bylaı deıdí:
"Bízdíń patrıottyq ortalyǵymyzdyń basty maqsaty – elímízdíń damuyna ólsheusíz úles qosqan tūlǵalardyń ómír jolymen, eńbegímen, memleketke síńírgen qyzmetímen jastardy tanystyru. Óıtkení bárímíz jaqsy bílemíz, tūlǵasyz tarıh jasalmaıdy. Tarıhty tūlǵa arqyly tanımyz. Sondyqtan bíz jas ūrpaqty memleket jáne qoǵam qaıratkerleríníń ómírbayanymen, elge degen adaldyǵymen, eńbektegí tabystarymen tereńírek tanystyrudy kózdep otyrmyz. «AMANAT» partıyasymen bírlese otyryp, bíz jastarǵa patrıottyq tárbıe beru baǵytynda júıelí oqytu jūmystaryn jalǵastyratyn bolamyz", deıdí ol.
Osydan keıín jınalǵandar Kákímbek Salyqūly turaly derektí fılmdí tamashalady.
«Jas ūrpaq» ortalyǵy halqymyzdyń bírtuar tūlǵalary Bauyrjan Momyshūly, Álıhan Bókeıhan, sondaı-aq basqa da ūly qaıratkerlerdíń ómír jolymen tanystyrudy josparlap otyr.