Sınoptıkter 16–18 jeltoqsan aralyǵyna arnalǵan aýa raıy boljamyn jarıalady. Mamandardyń aıtýynsha, aldaǵy kúnderi Qazaqstannyń basym bóligi arqyly aýqymdy sıklon ótedi, dep habarlaıdy AqshamNews.kz tilshisi.
Boljamǵa saı, el aýmaǵynyń kóp bóliginde qar jaýyp, burqasyn soǵady. Al ońtústik pen ońtústik-shyǵysta jaýyn-shashyn jańbyr men qar túrinde túsip, kóktaıǵaq bolýy yqtımal. Taýly óńirlerde de burqasyn kúsheıedi.
Respýblıka boıynsha ekpindi jel kútiledi: jyldamdyǵy 15–20 m/s-qa deıin, keı aýmaqta 23–28 m/s-qa deıin kúsheıýi múmkin. Ońtústik jáne ońtústik-shyǵys aımaqtarda túnde jáne tańerteń tuman túsýi yqtımal.
Temperatýralyq fon da qubylady. Batys óńirlerde túnde aýa temperatýrasy -10…-18°S-ten -3…-13°S-qa deıin ózgerip, kúndiz -15…0°S-ten +5…-3°S-qa deıin kóteriledi. Soltústik, ortalyq jáne shyǵysta túngi aýa temperatýrasy -7…-15°S-ten -12…-28°S-qa deıin tómendep, kúndiz -5…-15°S shamasynan -8…-18°S-qa deıin sýytady. Ońtústik pen ońtústik-shyǵysta túnde -3…-11°S-ten -5…-20°S-qa deıin tómendep, kúndiz -5…+2°S-ten -1…-13°S-qa deıin aýytqýy múmkin.