Pavlodar oblysynyń Baıanaýyl aýdanynda aýyl turǵyndary muz qursaýynda qalǵan aqqýlar jubyn ajaldan arashalap qaldy. Oqıǵa Tulýsor atty shaǵyn kólde bolǵan, dep habarlaıdy AqshamNews.kz tilshisi.
Instagram jelisinde taraǵan vıdeony Birlik aýylynyń turǵyny Baýyrjan Jaqypov jarıalaǵan. Onyń aıtýynsha, ol ákesimen birge qatyp qalǵan kól betinde álsirep otyrǵan bir aqqýdy baıqap, dereý kómekke kirisken. Qutqarý sáti kóptiń júregin eljiretip, jelide jyldam tarap ketti.
Vıdeoda muzdan bosatylǵan aqqýdyń ózine kómektesken er adamdy moınymen qushaqtap alǵany kórinedi. Osydan keıin ákeli-balaly ekeýi kólde taǵy bir aqqýdyń baryn ańǵaryp, oǵan da asyqqan. Ekinshi qustyń da qaýyrsyny muzǵa qatyp qalypty. Jigit qusty abaılap bosatyp, keıin eki aqqýdy da kólikke otyrǵyzyp alyp ketken.
Pavlodar oblystyq orman jáne janýarlar dúnıesin qorǵaý mekemesiniń basshysy Ajdar Júsipovtiń aıtýynsha, aqqýlar aýa raıynyń kúrt sýytýyna baılanysty jyly jaqqa ushyp úlgermeı qalýy múmkin. Kúndizgi jylymyqtan keıin túnde kóldiń muzy qata túsip, álsiregen analyq aqqý muz tuzaǵyna túsken. Al atalyq aqqý ony tastamaı, janynda qalyp qoıǵan.
Belgili bolǵandaı, Baýyrjan Jaqypov qustardy ýaqytsha qoraǵa ornalastyryp, kútim jasap otyr. Analyq aqqýdyń tabandary sál úsigen, al atalyǵy qatty álsirep qalǵan. Degenmen qazir ekeýiniń de jaǵdaıy jaqsaryp keledi: jemdi jaqsy jep jatyr. Alǵashynda balalar taǵamyn berse, qazir ýatylǵan suly men bıdaı qosyp qorektendirip júr.
Qustar tolyq saýyǵyp ketse, turǵyndar olardy kóktemde tabıǵatqa qaıta jiberýdi josparlap otyr. Qutqarý sáti túsirilgen beıne 200 myńǵa jýyq qaralym jınap, myńdaǵan pikir qaldyrylǵan. Jelidegiler aýyl azamattarynyń janashyrlyǵyna rızashylyq bildirip, aq tilekterin jaýdyrǵan.