Almatyda 2015 jyldan beri alǵash ret №7 qalalyq klınıkalyq aýrýhananyń janyndaǵy jer asty jaıaý júrginshiler ótkeli jóndeledi.
«Qalqaman» 7 qalalyq aýrýhanasynyń janynda ornalasýyna baılanysty halyq arasynda bul jer asty ótkeli «Qalqaman» dep atalady. Jóndeý jumystary aıasynda keramogranıtti plıtalar ornattyq. Ári eski jaryq júıesin tolyǵymen alyp tastap, antıvandaldy sham ornatamyz, bul jer asty ótkeli aýmaǵyn jaryqtandyrýǵa, azamattardyń qaýipsizdigin qamtamasyz etýge múmkindik beredi. Qala ákimi ótkelderdi jaryqtandyryp, qaýipsizdikti qamtamasyz etý mindetin júktedi. Jaǵdaıdy baqylaý úshin polısıa pýnktimen baılanysy bar beınebaqylaý kameralaryn tolyǵymen aýystyramyz», - dedi Naýryzbaı aýdanynyń ákimi Nazıra Toǵyzbaeva.
Beınebaqylaý ótkeldegi stıhıalyq bazarlardyń aldyn alýǵa, sadaqa suraǵan adamdardy baqylaýǵa, sonymen qatar, jıi kezdesetin dúnıe-múlikti qıratý sekildi buzaqylyqtyń jolyn kesýge septigin tıgizedi.
«Buryn ótkelde dybystyq qurylǵylar bolǵan, biraq qazir olar istemeıdi, sondyqtan adamdar ótip bara jatqanda áýen oınaıtyndaı etip jańasy ornatylyp jatyr. Bizdiń jer asty ótkeliniń ereksheligi, Qazaqstan sýretshiler odaǵynan tapsyrys aldyrǵan panno. Ol temirden jasalady. Onda beınelengen Qalqaman batyr bizdiń shaǵyn aýdanymyzdyń beınesi ispetti bolady. Bul pannoda saýyt-saımanda, qalqandar jáne árıne, at jarysy egjeı-tegjeıli kórsetilgen. Pannonyń tómengi jaǵynda osy tarıhı keıipker týraly kóbirek bilýi úshin QR kod ornatamyz, munyń jas urpaq úshin tárbıelik máni zor. Qashan paıda boldy, qandaı áleýmettik nysandar bar, qandaı qurylys salynyp jatyr, qandaı mektepter men balabaqshalar ashylady degendeı jalpy, Naýryzbaı aýdany týraly da bilýge bolady», - dedi Naýryzbaı aýdanynyń ákimi.
Qazirgi kezde aýdanda úsh jer asty ótkeli jóndelip jatyr. Jumys 2023 jyldyń sońyna deıin aıaqtalady.