Úsh dúrkin álem chempıony Nazym Qyzaıbaı jeke boks zalyn ashý jospary úshin Olımpıadadan keıin syıǵa alǵan kóligin satatynyn aıtty, dep habarlaıdy AqshamNews.kz tilshisi.
Boksshynyń jazýynsha, 2025 jylǵa úsh úlken maqsat qoıǵan: álem chempıonatyn úshinshi ret jeńý, ata-anasyna keń úı alyp berý jáne óz zalynyń esigin ashý. Onyń aıtýynsha, bul josparlardyń ekeýi oryndalǵan.
«Úsh dúrkin álem chempıony boldym. Bıyl eki álem chempıonaty ótkendikten, rekordymdy jańartqym kelgen edi, biraq ekinshisinde kúmis medal aldym. Osylaısha álem chempıonatyndaǵy júldelerim tolyq komplekt boldy. Otbasyma úlken úı aldym, bári qýanyp otyr», – dep bólisti sportshy.
Nazym Qyzaıbaı jyl sońyna deıin úshinshi armanyn da júzege asyrmaq. Ol ózine unaǵan shaǵyn ǵımaratty qarap qoıǵanyn aıtyp, soǵan qarajat jınaý úshin kóligin satýǵa sheshim qabyldaǵanyn jetkizdi.
«Qazir shaǵyn ǵımaratty qarastyryp qoıdym, kóńilimnen shyqty. Sondyqtan bir habarlandyrý jasaıyn dedim: ózimniń kóligimdi satamyn. Bul kólik maǵan Olımpıadadan keıin syıǵa berilgen. Bir jyldan asa ýaqyt mindim, jaǵdaıy jaqsy», – dep túıindedi ol.