Jylda áýejaı jumysyna búdjetten 200 mln teńge jumsalady
Petropavl áýejaıy eki ret satylymǵa shyǵarylyp, ótpedi. Jergilikti bılik mańyzdy nysandy senimgerlik basqarýǵa berip, shyǵyndy kásiporynnyń jaǵdaıyn túzemek, dep habarlaıdy Almaty-akshamy.kz QazAqparatqa silteme jasap.
Soltústik Qazaqstan oblysynyń ákimi Qumar Aqsaqalovtyń aıtýynsha, áýejaı múlki jaqyn mańda taǵy da saýdaǵa túsedi.
«Birinshi saýdada ótpegendikten ekinshi ret baǵasyn eki ese arzandatýǵa májbúr boldyq. Osy joly, úshinshi saýdada alǵashqy qunyn qaıtaramyz, ıaǵnı 5,6 mlrd teńgege saýdalanbaq. Qyzyǵýshylar tabylýy múmkin», - deıdi óńir basshysy.
Qumar Aqsaqalovtyń aıtýynsha, jyl saıyn áýejaı jumys isteýi úshin búdjetten 200 mln teńge jumsalady.
«Qazir áýejaı jumys istep tur. Biraq avıasıalyq qaýipsizdik qyzmeti bizge ondaǵy olqylyqtardyń ornyn toltyryńdar dep únemi aıtady. Máselen munaı qoımasy kerek. Sonda úlken ushaqtar ushatyn bolady, bul tasymaldy arttyrady. Biraq bul máseleni sheshý úshin úlken ınvestısıa qajet. Kóptegen mamandardy tartý qajet. Ókinishke oraı, biz ázirge búdjet qarajatyna bul shyǵyndardy engize almaımyz. Investorlar kelip, bıznesti júrgizýi kerek. Ol úshin halyqaralyq áýe kompanıalarymen baılanys ornatyp, kelissózder júrgizý qajet. Ákimdik bul sharýamen aınalysa almaıdy», - dedi SQO ákimi.
Buǵan deıin Petropavl áýejaıynyń satylymǵa shyǵarylǵanyn aıtqan edik.
Saýda 12 mamyr kúni ótip, áýejaı satylmady.