Elimizde halal ónimder shyǵaratyn 4 200-den astam óndirýshi bar
Qazaqstan halal ónimderin sertıfıkattaýdy júrgizý quqyǵy ıe boldy. Mundaı ruqsat Birikken Arab Ámirlikteriniń halyqaralyq akredıtteý ortalyǵynan alyndy, dep habarlaıdy Almaty-akshamy.kz QazAqparatqa silteme jasap.
QR Premer-Mınıstriniń orynbasary - Saýda jáne ıntegrasıa mınıstri Baqyt Sultanovtyń aıtýynsha, búgin Birikken Arab Ámirlikteriniń halyqaralyq akredıtteý ortalyǵy QazStandart zerthanasyn akredıtteý týraly resmı qujat berdi. QazStandart zerthanasy, sondaı-aq halal ónimderin sertıfıkattaý quqyǵyna ıe boldy.
«El ishinde Halal halyqaralyq sertıfıkatyn alý múmkindigi eksportty arttyrýǵa yntalandyrady dep senemin. Eger qazir kásiporyndar halal sertıfıkatyn alý úshin (ımporttaýshy elde) bir partıaǵa 7 myńnan 30 myń dollarǵa deıin jumsasa, Qazaqstandaǵy sertıfıkattaý quny serıalyq óndiriske 700 myń teńgeden (1,5 myń dollar) bastalady. Bul zerthananyń sertıfıkattaý nátıjeleri Parsy shyǵanaǵyndaǵy barlyq arab memleketteriniń (Bahreın, Katar, Kýveıt, BAÁ, Oman, Saýd Arabıasy) aýmaǵynda moıyndalady. Sonymen qatar eksport kólemin basqa aımaqtarǵa, máselen Iran, TMD, Túrkıa jáne basqa elderge ulǵaıta alamyz», - dep jazdy Baqyt Sultanov Facebook-paraqshasynda.
Vıse-premerdiń dereginshe, Qazaqstanda tamaq ónimderi, toqyma, farmasevtıka, turmystyq hımıa jáne kosmetıka syndy halal ónimder shyǵaratyn 4 200-den astam óndirýshi bar.
«Aıtpaqshy, zerthanamyz EAEO pen Ortalyq Azıadaǵy halyqaralyq talaptar boıynsha akkredıttelgen jalǵyz zerthana sanalady. Demek biz halal boıynsha óńirlik habqa aınalýdamyz. Azıa, EAEO jáne TMD elderiniń kásipkerleri óz ónimderiniń sáıkestigin baǵalaý jáne Parsy shyǵanaǵy elderiniń naryǵyna shyǵý úshin bizdiń zerthanany paıdalana alady», - dedi B.Sultanov.
Budan bólek, onyń málimetinshe, Qazaqstanda eksport kólemin ulǵaıtý boıynsha jumystar atqarylyp jatyr.
«2025 jylǵa qaraı shıkizattyq emes eksport kólemin 41 mlrd dollarǵa jetkizýdi kózdeımiz. Jyldyń alǵashqy úsh aıynda birqatar negizgi saýda seriktesimizben taýar aınalymyn edáýir ulǵaıttyq. Eýroodaq elderimen ózara saýda kólemi ótken jyldyń qańtar-naýryzymen salystyrǵanda shamamen 55,2 paıyzǵa ósti. AQSH-pen - 35,6, Qytaımen - 25,1 paıyz. Ósim shıkizat jáne óńdelgen taýarlarda da baıqalady», - dedi Úkimet basshysynyń orynbasary - Saýda jáne ıntegrasıa mınıstri.