Memleket basshysy Qasym-Jomart Toqaev birqatar oblys ákimderin qabyldady, dep habarlaıdy Almaty-akshamy.kz.
Qasym-Jomart Toqaevqa Batys Qazaqstan oblysynyń ákimi Narıman Tóreǵalıev óńirdiń bıylǵy áleýmettik-ekonomıkalyq damýynyń negizgi kórsetkishteri týraly baıandady. Sondaı-aq, ınvestısıalyq jobalardyń jáne Jumyspen qamtý jol kartasynyń júzege asyrylý barysy týraly málimet berildi.
Sonymen qatar, Prezıdenttiń qabyldaýynda bolǵan Pavlodar oblysynyń ákimi Asaıyn Baıhanov Ekibastuz JES-iniń jylý jelilerindegi apattyń saldaryn joıýǵa baǵyttalǵan sharalar jóninde esep berdi. Onyń aıtýynsha, Ekibastuz qalasynyń jylý júıesin qalpyna keltirý jumystary 15 jeltoqsanǵa deıin aıaqtalady. Kezdesýde oblystyń negizgi áleýmettik-ekonomıkalyq kórsetkishteri jáne aýyl sharýashylyǵyn damytý, aýyl halqyn sapaly aýyzsýmen qamtamasyz etý, kólik ınfraqurylymy men turǵyn úı qurylysyn damytý jónindegi tapsyrmalardyń oryndalý barysy baıandaldy.
Budan keıin Memleket basshysynyń qabyldaýynda Soltústik Qazaqstan oblysynyń ákimi Aıdarbek Saparov boldy. Ol óńirdi damytý jospary men berilgen tapsyrmalardyń oryndalýy jóninde málimet berdi.
Qasym-Jomart Toqaevqa Qumar Aqsaqalov Qostanaı oblysynyń qazirgi áleýmettik-ekonomıkalyq damýynyń negizgi kórsetkishteri týraly esep berip, óńirdegi áleýmettik-ekonomıkalyq ósim men ınvestısıa tartý jóninde baıandady. Sonymen qatar, ákim Prezıdentke Qostanaıda ótetin HİH óńiraralyq forýmǵa daıyndyqtyń bastalǵanyn jetkizdi.
Memleket basshysy jańadan taǵaıyndalǵan oblystardyń ákimderine óńirlerdi damytý jáne turǵyndardyń ál-aýqatyn arttyrý jóninde birqatar naqty tapsyrma berdi. Sondaı-aq, aýyl sharýashylyǵyna jan-jaqty qoldaý kórsetý arqyly aýyldardyń órkendeýin qamtamasyz etýdi, ınfraqurylymdardy jańǵyrtyp, kólik-logıstıkalyq ahýaldy jaqsartýdy tapsyrdy.