Prosedýralardy sıfrlyq formatqa kóshirý kózdelgen
Ótken aptada Qazaqstan saýdasyn jeńildetý jónindegi Ulttyq aqparattyq portaly iske qosyldy. Bul týraly saýda jáne ıntegrasıa mınıstri Baqyt Sultanov áleýmettik jelide jazdy, dep habarlaıdy Almaty-akshamy.kz.
«Tradeinfo.kz - saýda portaly eksporttaýshylar men ımporttaýshylar úshin barlyq saýda prosedýralaryna arnalǵan nusqaýlyq bolyp tabylady. Biz ártúrli taýar túrlerin ımporttaýǵa, eksporttaýǵa jáne tranzıtteýge qoldanylatyn barlyq qadamdyq erejeler men rásimderdi bir jerde jınadyq (taýarlar sany birtindep artyp otyrady). Bizdiń mindetimiz - syrtqy saýda qatysýshysynyń qyzmet túrine qaramastan talap etiletin rásimder, qujattardyń túrleri týraly aqparat, qujattardy toltyrý tártibi jáne t.b. qajetti aqparatty bir jerden alatyndaı múmkindik jasaý», – dep jazdy Baqyt Sultanov.
Mınıstrdiń aıtýynsha, negizgi mindet transshekaralyq saýdany barynsha jeńildetý jáne prosedýralardy sıfrlyq formatqa kóshirý. Bul barlyq qatysýshylar úshin yńǵaıly, búkil prosesti aıtarlyqtaı jyldamdatady, bári ashyq jáne ońaı basqarylady.
«Biz basqa organdardaǵy áriptesterimizben birge keıbir qaıtalanatyn talaptardy joıý jáne jekelegen talaptardy qysqartý boıynsha jumys júrgizip jatyrmyz. Saýda portalymen proses jyldam júretinine senimdimin - biz portaldy kásipkerlermen ıntegratıvti keri baılanys quraly retinde qarastyramyz jáne bıznes qaýymdastyqtarmen jáne ýákiletti organdarmen saýda rásimderin jeńildetý boıynsha barlyq ıdeıalardy pysyqtaımyz. Saıyp kelgende, maqsat kedendik ınfraqurylymdy jańǵyrtý, transshekaralyq operasıalardy ońtaılandyrý, saýda formaldylyqtaryn ońaılatý, úılestirý jáne avtomattandyrý jónindegi keshendi sharalar bolýǵa tıis. Osy máselelerdiń barlyǵyn biz QR Úkimeti janyndaǵy saýda rásimderin jeńildetý jónindegi Ulttyq komıtettiń qyzmeti sheńberinde kóteretin bolamyz», – dedi mınıstr.
Saýda portaly boıynsha jumys 2020 jyldan beri júrgizilip keledi.
«Bizge Eýropalyq Odaqtyń qoldaýymen Halyqaralyq saýda ortalyǵy júzege asyryp jatqan "Ready4Trade - Ortalyq Azıa" jobasy úlken kómek kórsetti. Halyqaralyq jáne Ulttyq konsýltanttardyń, onyń ishinde "Ready4trade - Ortalyq Azıa" jobasynyń bas seriktesi - bizdiń "QazTrade" kompanıasy qyzmetkerleriniń eki jyldyq komandalyq jumysynyń jemisi. Men barlyq kásipkerlerdi portaldyń aqparattyq múmkindikterin paıdalanýǵa shaqyramyn», – dedi saýda jáne ıntegrasıa mınıstri Baqyt Sultanov.