Árqaısymyz óz tańdaýymyzdy jasaý múmkindiginen qalys qalmaıyq.
Almaty ákimdigi «Almaty – adamdar úshin jahandyq qala» baǵdarlamasyn ázirledi, onda megapolısti 2025 jylǵa deıin damytýdyń negizgi basymdyqtary men 2030 jylǵa deıingi orta merzimdi perspektıvalar kórsetilgen. Qala turǵyndary baǵdarlamamen tanysyp, óz usynystaryn «Almatyny damytý ortalyǵynyń» saıtynda 2022 jyldyń 1 shildesine deıin qaldyra alady. Bul týraly Almaty qalasy Qoǵamdyq keńes múshesi Janat Qasymjanova pikir bildirdi, dep habarlaıdy Almaty-akshamy.kz.
«Almatylyqtar úshin jaǵymdy jańalyq! Búgin Almaty qalasy ákimdiginiń «Almaty qalasynyń 2025 jylǵa deıingi damý josparynyń negizgi basymdyqtary jáne 2030 jylǵa deıingi orta merzimdi perspektıvalar» jobasy talqylaýǵa usynyldy. Bul - ár qala turǵynynyń óz únin qosatyn, óz tańdaýyn bildiretin jáne óziniń súıikti qalasynyń kórkeıýine óz úlesin qosa alatyn múmkindik ekenin atap ótkim keledi. Jobany daıarlaý barysynda qalanyń bolashaq damý baǵyty ár túrli saladaǵy belsendi jáne bilikti sarapshylarmen talqylandy, endi qala turǵyndarynyń nazaryna usynylyp otyr. Sondyqtan, árqaısymyz óz tańdaýymyzdy jasaý múmkindiginen qalys qalmaıyq, sebebi qalamyzdyń jaqsarýy óz qolymyzda»,- dep jazdy Janat Qasymjanova.