Bul jolǵy baǵyt-baǵdardyń mánin Prezıdentimiz Amanat partıasynyń kezekten tys HHİİİ sezinde sóılegen sózinde bylaısha tıanaqtady: «Jańa Qazaqstan degenimiz – shyn máninde Ádiletti Qazaqstan». Bul týraly Memleket basshysy halyqqa arnaǵan Joldaýynda da birneshe ret atap kórsetken.
Ádiletti Qazaqstan. Qysqa da nusqa, tamasha anyqtama! Jemqorlarǵa, zańdy belden basýshylarǵa unaı qoımas, al men úshin kókten izdegenim jerden tabylǵandaı boldy. «Ádiletti» sóziniń birneshe sınonımi bar: «Ádilet», «Ádilettilik», «Ádildik». Báriniń túbiri bir sóz – ádil. Osynaý sózdi kezinde hakim Abaı da molynan qoldanǵan eken. Ádil jan tentekti de tyıatynyn, dushpanyna da qıanat jasamaıtynyn óleńmen órnektepti. Abaı «Ádiletti» sózin birde haqtyń joly dep bilse, keleside erlik maǵynasynda qoldanady. Mundaǵy haq – Qudaı, al erlik degeni, ǵulamanyń sózimen aıtsaq, «ádiletti aqyl moıyndaǵan nárseni, qıyn da bolsa moıyndaý».
Iá, búgingi Qazaqstan úshin álemmen básekelesýden buryn, haq jolyna túsý mańyzdyraq bolyp tur. «Urlyq túbi – qorlyq», «Ótiriktiń arty bir tutam» ekenine kózimiz ábden jetti. Ótirik pen urlyq bir jyl, eki jyl emes, ondaǵan jyl boıy qoǵamymyzdy obyrdaı jegen eken. Endi, mine, Tuńǵysh Prezıdenttiń mártebesine, Konstıtýsıaǵa qatysty máselelerdi qalaı shesherimizdi bilmeı otyrǵan jaıymyz bar.
«Kim – kimdi?» suraǵymen betpe-bet keldik. Mundaıda batyl da bastamashyldyqpen qımyldaǵandar ǵana jeńiske jetedi. Qańtardaǵy búlik tusynda Q.Toqaev qalaı eren batyrlyq kórsetse, endi búgin odan on ese iri erlik pen qaharmandyq kerek. Jartykesh sheshim men áreket jarǵa soqtyrady. Táýelsizdik dushpandarynyń kútkeni de sol. Qoly taza, aqyl-oıy sergek ári jaýjúrek jigitterdi jumyldyrǵannan basqa jol joq.
Ádiletti Qazaqstandy adal da ádil jandar ǵana qura alady. Ádilet saltanat qurǵanyna kózi jetken sátten halyqtyń jasampaz bula kúshi syrtqa shyǵady. Bılik sol qulshynysqa saı bolsa, álemdik báseke bıiginen kórinerimiz sózsiz. Halyq pen bılik jáne zıaly qaýymnyń ádildikke qurylǵan odaǵyna eshqandaı qara nıetti kúsh qarsy tura almaıdy.