Ótken jyl Qazaqstan úshin ońaı bolmaǵany ras. Elimizde buryn-sońdy bolmaǵan ishki saıası syn-qaterler, ekstremaldy ekonomıkalyq jáne kúrdeli syrtqy saıası jaǵdaılar oryn aldy. Ótken jyl barlyq qazaqstandyqtar úshin tyń ózgeristerge daıyndyqtyń ózindik synaǵy jáne jańartylǵan Qazaqstannyń sımvoldyq bastalýy boldy. Sonymen qatar, biz birlikke bekem el ekenimizdi, sanaly túrde tańdaý jasaı alatynymyzdy, óz egemendigimiz ben táýelsizdigimizdi qorǵaýǵa, ádil qoǵam qurýǵa jáne transformasıa jolynda alǵa jyljýǵa daıyn ekenimizdi dáleldeı tústik. 20 qarashadaǵy saılaýda halyq Prezıdent Qasym-Jomart Toqaevtyń «Ádiletti Qazaqstan: bárimiz jáne árqaısymyz úshin» atty reformalyq baǵdarlamasyn qoldaı otyryp, senim bildirdi.
Ekonomıkany basqarý júıesin jańǵyrtý jalǵastyrylýda, ekonomıkada memleket menshiginen alý jáne birqatar fýnksıalardy básekelestik ortaǵa berý boıynsha buryn jarıalanǵan kýrs qaıta júzege asyryldy. «QazMunaıGaz» UK IPO naryǵyna shyǵýy, bıznesti júrgizý jaǵdaılaryn jeńildetý jáne ákimshilik kedergilerdi azaıtý sharalary iske asyrylýda. Halyqty áleýmettik qoldaýdy kúsheıtý boıynsha sharalar belsendi júzege asyryldy. Halyqty ataýly áleýmettik kómekpen qamtýdy ulǵaıtý (atalǵan kómekti alýshylardyń sany 750 myń adam, al onyń jalpy kólemi 60 mlrd. teńge) densaýlyq saqtaý jáne bilim berý salasyndaǵy qarjylandyrý somalary da ósti.
Ekonomıkany ártaraptandyrý, básekelestikti damytý jáne monopolıasyzdandyrý boıynsha mańyzdy reformalar tájirıbelik iske asyrý kezeńine ótti. Osy reformalar aıasynda, Qazaqstanǵa shıkizattyq emes sektordy damytý úshin birneshe sheteldik kompanıalar tartyldy.
Memleket basshysy reformalardyń negizgi baǵyttaryn, onyń ishinde tarıftik retteý aýqymyn tómendetýdi, salyq pen búdjet saıasatynyń tıimdiligin arttyrýdy, sondaı-aq ekonomıkanyń óndiristik sektoryna banktik nesıe berýdi yntalandyrý maqsatynda aqsha-nesıelik retteýdi belgiledi. Túbegeıli ózgerister saıası ınstıtýttar, ortalyq jáne aımaqtar arasyndaǵy ókilettikterdiń bólinýine, ókildi bılikti qalyptastyrý qaǵıdattaryna, ekonomıkalyq qatynastarǵa áser etti. Prezıdenttiń Joldaýymen jáne konstıtýsıalyq túzetýlerdiń qabyldanýymen referendýmda eldiń aýqymdy qurylymdyq saıası jańǵyrýy iske qosyldy.
Saıası reformalar ekonomıkany jańǵyrtýǵa jáne ál-aýqatty arttyrýǵa múmkindik beretin jańa ekonomıkalyq saıasatty iske asyrýdyń berik negizin qalady jáne bizdiń elimiz úshin aldaǵy onjyldyqtardaǵy ózgeristerdiń bastamasy boldy. Elimizdiń qoǵamdyq-saıası ómirinde áli de kóp nárseni ózgertý kerek. Ol úshin azamattyq qoǵamnyń jáne bıznestiń belsendi aralasyp qatysýy qajet. Azamat, qoǵam, bıznes pen memleket arasyndaǵy turaqty qarym qatynastar jáne ashyq dıalog oryn alǵan jaǵdaıda ǵana nátıjeli sheshimderge qol jetkizýge bolady.
Prezıdent Q.Toqaevtyń reformalyq baǵytyna sáıkes, 2023 jyly biz birqatar ekonomıkalyq reformalardy júzege asyrýymyz qajet. Al endi, árıne, ekonomıkany basqarýdyń is júzinde tabysty jumys isteýi naqty rettelgen tetikterdi qajet etedi jáne nátıjeli jumys istep turǵan ınstıtýttardyń tıimdiligine baılanysty ekeni ras.