Qazaqstandyq loýkoster FlyArystan ata-ana qamqorlyǵynsyz qalǵan erekshe qajettilikteri bar balalarǵa jan-jaqty ońaltý kómegin kórsetýge baǵyttalǵan «Úmit» áleýmettik jobasyn júzege asyrý úshin «Terıtorıa ýspeha» qoǵamdyq birlestigine qarjylyq qoldaý kórsetti, dep habarlaıdy aqshamnews.kz.
Rıchard Ledjer, «FlyArystan» AQ Prezıdenti:
«Mundaı jobalardy qoldaý – bizdiń korporatıvtik jaýapkershiligimizdiń ajyramas bóligi. Biz úshin bul kómektiń bir rettik emes, júıeli sıpatta bolǵany asa mańyzdy. Osy rette Komek áleýmettik baǵdarlamasyna erekshe nazarymyzdy aýdaramyz. Bul baǵdarlama aıasynda birinshi toptaǵy múgedektigi bar jandar men olarmen birge júretin tulǵalarǵa áýebıletterine jeńildik usynylady. Mundaı qoldaý olardyń elimizdiń ártúrli óńirlerinde medısınalyq, bilim berý jáne áleýmettik qyzmetterge qoljetimdiligin qamtamasyz etýge baǵyttalǵan. Sonymen qatar, «Júrek ortalyǵy» qoǵamdyq qorymen birlesken joba sheńberinde biz dárigerlerdiń óńirlerge áýebıletterimen qamtamasyz etip kelemiz. Biz adamdardyń ómirinde naqty ózgeris ákeletin, olardyń múmkindikterin keńeıtip, óz-ózine degen senimin arttyratyn jáne asa qajet sátterde qoldaý kórsete alatyn uzaq merzimdi strategıa qurýǵa umtylamyz».
Balalardyń serebraldy sal aýrýyna (DSP) shaldyqqan jaǵdaıynda keshendi ońaltýǵa baǵyttalǵan «Úmit» jobasy emdik dene shynyqtyrý jattyǵýlaryn, osteopattar, massaj mamandary, logopedter jáne ózge de beıindi mamandardyń qyzmetin qamtıdy. Bul bastama balalarǵa qalpyna keltirý emin ǵana emes, sondaı-aq áleýmettik beıimdelý jáne bazalyq bilim alý múmkindikterin usynady.
Rymgúl Ýtepova, «Terıtorıa ýspeha» qoǵamdyq birlestiginiń basqarma tóraıymy:
«Atalǵan joba 2024 jyldyń qazan aıynda iske qosyldy. FlyArystan kompanıasymen «Úmit» bastamasy boıynsha birlesken jumysymyzdy bıylǵy jyldyń naýryz aıynda, meıirim men járdem ýaqyty – qasıetti Ramazan aıynda bastadyq. Áýekompanıanyń qoldaýymen biz serebraldy sal aýrýy dıagnozy qoıylǵan balalar tobyna sapaly ári keshendi ońaltý sharalaryn uıymdastyra aldyq. Bul tek medısınalyq jáne fızıkalyq kómekti ǵana emes, sonymen qatar balalardyń beıimdelýine, komýnıkasıalyq daǵdylaryn damytýǵa jáne óz-ózine senim qalyptastyrýǵa baǵyttalǵan súıemeldeýdi de qamtydy. FlyArystan syndy iri seriktestermen yntymaqtastyq – rasymen de ınklúzıvti, ári qamqor qoǵam qurýǵa serpin beretin mańyzdy qadam dep senemiz».
2024 jyly da áýekompanıa «Terıtorıa ýspeha» uıymyna demeýshilik kórsetken bolatyn. Atap aıtqanda, aıtreker arnaıy qurylǵylaryn satyp alýǵa kómektesti. Kóz qozǵalysyn baqylaý arqyly jumys isteıtin bul ınovasıalyq qurylǵylar sóıleý jáne qımyl-qozǵalys qabileti aýyr buzylǵan jandarǵa sıfrlyq servısterdi basqarýǵa múmkindik beredi. Aıtreker kóptegen balalar men eresekter úshin tolyqqandy qarym-qatynas pen derbestikke bastar «kópirge» aınaldy.
FlyArystan týraly:
FlyArystan – Air Astana tobynyń 100% enshiles kompanıasy bolyp tabylatyn qazaqstandyq loýkoster. Ol óz qyzmetin 2019 jyldyń mamyr aıynda bastady. 2025 jyldyń qańtar aıynan bastap FlyArystan óz sertıfıkatymen, FS kody boıynsha táýelsiz áýekompanıa retinde qyzmet kórsetýde. Áýekompanıa Almaty, Astana jáne Aqtaý qalalarynda ornalasqan bazalaryndaǵy zamanaýı A320 ushaqtarynan quralǵan áýe parkimen keń aýqymdy marshrýttar jelisi boıynsha reıster oryndaıdy. FlyArystan marshrýttar jelisi ishki jáne halyqaralyq reısterdi, sondaı-aq charterlik baǵyttardy qamtıdy. FlyArystan 2023 jáne 2024 jyldary eki ret Skytrax World Airline Awards tarapynan Ortalyq Azıa jáne TMD-nyń eń úzdik búdjettik áýekompanıasy dep tanyldy.
«Terıtorıa ýspeha» týraly:
«Terıtorıa ýspeha» qoǵamdyq birlestigi 2016 jyly erekshe qajettilikteri bar balalardyń eki anasy tarapynan quryldy. Uıym múmkindigi shekteýli balalardy ońaltýǵa baǵyttalǵan ınklúzıvti jáne bilim berý jobalaryn júzege asyrady, otbasylarǵa psıhologıalyq jáne keńestik qoldaý kórsetedi, mamandar men ata-analarǵa arnalǵan trenıńter men semınarlar ótkizedi, sondaı-aq kóshpeli is-sharalar men qaıyrymdylyq merekelerin uıymdastyrady.