Aqmola oblysynda polısıa qyzmetkeri Serǵazy Meıirmanov shırek ǵasyrdan beri turaqty túrde donor bolyp, osy ýaqyt ishinde 20 lıtrge jýyq qan tapsyryp, 80-ge jýyq adamnyń ómirin saqtaýǵa úles qosty, dep habarlaıdy Aqshamnews.kz tilshisi.
Kókshetaý qalalyq polısıa basqarmasynyń jedel-krımınalıstıkalyq bóliminde aǵa krımınalıs bolyp qyzmet etetin Serǵazy Meıirmanov donorlyq jolyn 2000 jyly, stýdent kezinde bastaǵan. Kýrstasynyń týysyna shuǵyl qan qajet bolǵanda, ol alǵashqylardyń biri bolyp kómektesýge asyǵypty.
«Sol kezde eshqandaı erlik jasamaı-aq, jaı ǵana qol ushyn sozý arqyly bireýdiń ómirin saqtap qalýǵa bolatynyn túsindim», – deıdi ol.
Oqý bitirip, ishki ister organdaryna qyzmetke turǵannan keıin de tártip saqshysy bul ıgi ádetinen jańylǵan joq. Ol «5 qaıyrymdy is», Jol apaty qurbandaryn eske alý kúni, Krımınalıser kúni sıaqty kásibı merekeler aıasynda ótetin donorlyq aksıalarǵa turaqty túrde qatysyp keledi.
Oblystyq qan ortalyǵynyń málimetinshe, Serǵazy Meıirmanov 40-tan astam ret donasıa jasap, shamamen 20 lıtr bıomaterıal tapsyrǵan. Bul kómek 80-ge jýyq adamnyń ómirin saqtaýǵa sep bolǵan.
İzgi isi úshin oǵan oblystyq qan ortalyǵy men İİM basshylyǵy atynan Alǵys hat tabystaldy. Qazir ol áriptesteri men jas mamandar arasynda donorlyq mádenıetti nasıhattap, qaıyrymdylyqqa úndep júr.