Almatyda bir top qaraqshy páterge basyp kirip, úı ıelerin soqqyǵa jyqqan. Olar úı ıelerin ańshy myltyǵymen qorqytyp, aqshanyń qaıda jasyrylǵanyn aıtýdy talap etken, dep habarlaıdy Aqshamnews.kz tilshisi.
Qylmys sátin shabýyldaýshylar ózderi vıdeoǵa túsirgen. Betterin jasyryp, úıdegilerdi uryp-soqqan. Úı ıeleriniń biri bólmege bekingenimen, kúdiktiler esikti buzyp kirip, qarýmen qoqan-loqy kórsetken.
Keıin polıseıler qaladaǵy kompúterlik klýbtardyń birinde alty kúdiktini ustady. Tintý barysynda ańshy myltyǵy men oq-dáriler tárkilendi. Atalǵan fakti boıynsha qylmystyq is qozǵalyp, tergeý bastaldy. Almaty qalalyq PD resmı ókili Saltanat Ázirbektiń aıtýynsha, barlyq qatysýshylar anyqtalyp, kúdiktiler qamaýǵa alynǵan.