Búgin, 23 shildede Almaty jurty belgili jýrnalıs Muhtar Túmenbaıdy aqtyq saparǵa shyǵaryp saldy, dep habarlaıdy aqshamnews.kz tilshisi.
Astanada bastalǵan Muhtar Túmenbaımen qoshtasý rásimi Almatyda jalǵasty. 22 shildede ótken qonaqasynda Memlekettik keńesshi Erlan Qarın, Prezıdenttiń keńesshisi Baýyrjan Omarov bastaǵan zıaly qaýym ókilderi, jazýshylar, BAQ basshylary sóz sóılep, Muhtar Jaqsylyqulynyń qysqa ǵumyrda atqarǵan isterin, azamattyq belsendiligin atap ótti.
Búgin, 23 shildede Almatynyń Bas meshitinde marqumnyń janazasy oqylyp, Keńsaı-2 zıratyna jerlendi.
Janazadan keıin berilgen asqa Muhtar Túmenbaı dúnıege kelgen Qyzylorda oblysynan arnaıy delegasıa keldi. Oblys ákiminiń, Aral aýdanynyń, Sazdy aýylynan kóńil aıtyldy. Sondaı-aq, saıasatker Qýanysh Sultanov, Jazýshylar Odaǵynyń tóraǵasy Mereke Qulkenov pen áriptesteri marqum jaıly estelikterin bólisip, Abaı oblysynyń ákimi Berik Ýálı men Almaty qalasynyń ákimi Darhan Satybaldynyń týǵan-týysqandaryna kóńil aıtý haty oqyldy.
Eske salaıyq, 21 shildede belgili jýrnalıs Muhtar Túmenbaıdyń 55 jasqa qaraǵan shaǵynda júrekten qaıtys bolǵany habarlanǵan bolatyn. Ol - belgili jazýshy Jaqsylyq Túmenbaevtyń uly. Ál-Farabı atyndaǵy Qazaq ulttyq ýnıversıtetinde bilim alǵan. Eńbek jolynda birqatar basylym men respýblıkalyq telearnalarda qyzmet atqarǵan. «Qazaqstan» telearnasyndaǵy «Apta» aqparattyq-saraptamalyq baǵdarlamasynyń júrgizýshisi retinde kórermenge keńinen tanyldy. Sondaı-aq ol - «Mánshúk. Ákege arasha túsken qyz», «Tórt qaısar», «Álıa. Erlik algorıtmi» syndy soǵys qaharmandaryna arnalǵan derekti fılmderdiń avtory edi. Ulttyq múddeni joǵary qoıatyn jýrnalıs retinde qoǵamdaǵy kóptegen ózekti máselelerdi ótkir kóterip, jurtshylyq iltıpatyna bólenip júretin.