Ortalyq komýnıkasıalar qyzmetiniń alańynda ótken brıfıń barysynda Almaty qalasynyń ákimi Darhan Satybaldy shaǵyn jáne orta bıznestiń megapolıs ekonomıkasyndaǵy zor úlesin, sondaı-aq týrısik salanyń damýyndaǵy oń serpindi atap ótti.
"Shaǵyn jáne orta bıznes Almaty ekonomıkasynyń negizgi draıveri bolyp qala beredi. Bul sektor jalpy óńirlik ónimniń shamamen 60%-yn jáne jergilikti búdjetke túsetin kiristerdiń basym bóligin qamtamasyz etip otyr. Qaladaǵy eńbekke qabiletti halyqtyń shamamen 90%-y, ıaǵnı 1 mıllıonnan astam adam shaǵyn jáne orta bıznes salasynda jumyspen qamtylǵan. Jumys istep turǵan shaǵyn jáne orta bıznes sýbektileriniń sany 9,4%-ǵa ósip, 387 myńǵa jetti. Al óndirilgen ónim kólemi 21%-ǵa artyp, 2025 jyldyń birinshi jartyjyldyǵynyń qorytyndysy boıynsha 13,2 trln teńgege jetti», – dedi Almaty qalasynyń ákimi.
Darhan Satybaldynyń aıtýynsha, kásipkerlikti qoldaý jáne ony odan ári damytý maqsatynda 2025 jyly búdjetten 50,8 mlrd teńge bólinip, 1 myńnan astam jobaǵa qoldaý kórsetildi. Atalǵan sharalar iskerlik belsendilikti keńeıtýge, jańa jumys oryndaryn qurýǵa jáne qalanyń ekonomıkalyq turaqtylyǵyn arttyrýǵa baǵyttalǵan.
Brıfıń barysynda Darhan Satybaldy Almatynyń jetekshi týrısik baǵyttardyń biri retindegi pozısıasyn nyǵaıtyp kele jatqanyn atap ótti. CNN Travel nusqasy boıynsha megapolıs 2025 jyly álemdegi eń úzdik 25 týrısik baǵyttyń qataryna endi.
"Bıylǵy 9 aıda qalamyzǵa 1,9 mln týrıs keldi, onyń ishinde 563 myń adam – sheteldik qonaqtar. Kórsetilgen týrısik qyzmet kólemi 17,4%-ǵa artyp, 82,4 mlrd teńgege jetti. Bul kórsetkishter qalanyń tartymdylyǵy artyp, týrısik ınfraqurylymnyń júıeli túrde damyp kele jatqanyn aıqyn kórsetedi», – dep sózin túıindedi Darhan Satybaldy.