Ortalyq komýnıkasıalar qyzmetiniń alańynda ótken brıfıńte Almaty qalasynyń ákimi Darhan Satybaldy megapolıstegi kólik keptelisi máselesi qoǵamdyq kólikti júıeli damytý arqyly sheshilip jatqanyn aıtty.
Ákimniń aıtýynsha, kólik qozǵalysynyń shamadan tys júktemesi qalanyń ekologıalyq jaǵdaıyna tikeleı áser etedi. Sondyqtan jeke avtokólikterge balama retinde qoǵamdyq kólikti damytýǵa basymdyq berilip otyr.
"Bul – kúrdeli másele. Keptelis ekologıaǵa tikeleı áser etedi, sebebi kólikter aýaǵa taraıtyn zıandy zattardyń 60%-yn shyǵarady. Biz Shanhaı, London jáne Máskeý sekildi qalalardyń tájirıbesin zerdeledik. Máskeýde 2016 jyly jeke avtokólikti paıdalanýshylardyń úlesi 60% bolsa, búginde bul kórsetkish 30%-ǵa deıin tómendedi, al qalǵan 70% turǵyn qoǵamdyq kólikti paıdalanady. Sondyqtan keptelis máselesiniń bir ǵana sheshimi bar", – dedi Darhan Satybaldy.
Ákimniń aıtýynsha, máseleni sheshýdiń tıimdi jolynyń biri – jyldam júretin qoǵamdyq kólik baǵyttaryn damytý. "Birinshiden, BRT jelilerin tez ári salystyrmaly túrde ońaı iske qosýǵa bolady. Sonymen qatar LRT jobasy da daıyndalyp jatyr, bul baǵyttar qatar júzege asyrylady", – dedi ol.
Qala basshysy metronyń damýyna da jeke toqtaldy. Onyń aıtýynsha, qazirgi ýaqytta birqatar nysandardy aıaqtaý merzimderi qaıta qaralyp jatyr.
"Maýsym aıynda metroǵa barǵanymda maǵan "Qalqaman" beketin aıaqtaýǵa 24 aı qajet delingen. Qazir bul jumystardy 8-9 aıda bitirý josparlanyp otyr. Mundaı jobalardy jedel júzege asyrý kerek", – dedi ákim.
Onyń aıtýynsha, qala metropolıtendi keńeıtýdi jalǵastyryp jatyr. "Kelesi jyly "Qalkaman" beketi men "Barlyq" bazary arasyndaǵy 5,3 shaqyrymdyq metro jelisiniń qurylysy bastalady. Sondaı-aq "Jibek joly" beketinen áýejaıǵa deıingi 14 shaqyrymdy qamtıtyn ekinshi jeli jobasy ázirlenip jatyr", – dedi Darhan Satybaldy.
Sóz aıaǵynda ákim metro men qoǵamdyq kólik damymaı, qaladaǵy kólik keptelisi máselesin sheshý múmkin emes ekenin atap ótti.