Almatyda aýmaqtyq damýdaǵy sáıkessizdikti joıý maqsatynda qalalyq polıortalyqtardy qurý jumystary bastaldy. Árbir polıortalyq adamdar jıi baratyn jeke orynǵa aınalyp, turǵyndardy senimdi ınfraqurylymmen qamtamasyz etedi. Bul týraly Ortalyq komýnıkasıalar qyzmetiniń alańynda ótken brıfıń barysynda Almaty qalasynyń ákimi Darhan Satybaldy málimdedi.
"Jobanyń negizinde qalalyq belsendilikke arnalǵan jańa ortalyqtar qurý ıdeıasy jatyr. Polıortalyqtardyń damý tujyrymdamasyn halyqaralyq sarapshylar ázirledi. Basty basymdyq – "Shyǵys qaqpasy" men "Batys" polıortalyqtaryn qalyptastyrý. Bul aýmaqtarda taqyryptyq oıyn-saýyq parki, Almaty sý arnasy, Almaty AI Park, EXPO Center, jańa stadıon jáne basqa da nysandardy ornalastyrý josparlanǵan. Atalǵan jobalardy júzege asyrý qala aýmaqtaryn birdeı damytýǵa, tarıhı ortalyqqa túsetin júktemeni azaıtýǵa jáne barlyq aýdandaǵy qalalyq ortanyń sapasyn arttyrýǵa múmkindik beredi", - dedi Almaty ákimi.
Sonymen qatar Darhan Satybaldy Memleket basshysynyń tapsyrmasyna sáıkes qalanyń Bas josparyna túzetýler engizilip jatqanyn atap ótti. Bul rette qalanyń joǵarǵy bóliginde kópqabatty turǵyn úı salýǵa buǵan deıin engizilgen moratorıı talaptary eskerilgen. Atalǵan qujatty bıyl 24-27 jeltoqsan aralyǵynda qoǵamdyq talqylaýǵa shyǵarý josparlanyp otyr.