Qaraǵandy qalasynda 16 jeltoqsanda Serik Sápıev atyndaǵy Boks ortalyǵynda Qazaqstannyń eńbek sińirgen jattyqtyrýshysy, belgili sport qaıratkeri Ǵalym Jarylǵapovty eske alýǵa arnalǵan 41-shi halyqaralyq týrnır óz jalaýyn kóterdi.
Dúbirli dodaǵa Qazaqstan, Tájikstan, Ózbekstan jáne Qytaı elderinen kelgen 216 úzdik boksshy qatysýda. Kórermender úshin kirý tegin bolǵan jarystyń ashylý saltanatynda sport súıer qaýymǵa tanymal sportshylar men belgili tulǵalar qurmetti qonaq retinde qatysyp, erekshe kóńil kúı syılady.
Alǵash bolyp jarysqa qatysýshylardy Olımpıada chempıony, Qaraǵandy oblysynyń dene shynyqtyrý jáne sport basqarmasynyń basshysy Serik Sápıev quttyqtady. Aıta ketý kerek, ol óz ýaqytynda osy týrnırde ózi de bokstasqan. Sondaı-aq Jarylǵapovtar áýletiniń jaqyn dosy, Olımpıada oıyndarynyń júldegeri, KSRO-nyń 1972 jylǵy úzdik fýtbolshysy Evgenıı Lovchev sóz sóıledi.
"Adamnan keıin tek estelik qalady. Bul týrnır 41-shi ret joǵary deńgeıde uıymdastyrylyp otyr. Bul - Ǵalym Jarylǵapovqa degen tereń qurmettiń, onyń esiminiń el jadynda máńgi saqtalǵanynyń dáleli", - dedi ol.
Týrnır tórt kúnge sozylady, al fınaldyq jekpe-jekter 20 jeltoqsanda ótedi. Boks jankúıerleri bul jarystan erekshe áser alyp, jaǵymdy emosıaǵa bólenedi dep senemiz.