Almaty №4 qalalyq klınıkalyq auruhana dárígerlerí úlken jatyr mıomasyn emdeu kezínde aǵzany saqtaıtyn ádístí sáttí qoldandy. Nátıjesínde nauqas radıkaldy ota jasalyp, aǵzany alyp tastau qaupínen aman qaldy.
44 jastaǵy Tatyanaǵa bírneshe jyl būryn ólshemí 10,0×6,0 sm, yaǵnı shamamen 14 aptalyq júktílíkke sáıkes keletín jatyr mıomasy dıagnozy qoıylǵan. Dárígerler dástúrlí ashyq ota arqyly jatyr men basqa da reproduktıvtík múshelerdí alyp tastaudy ūsynǵan. Būl jaǵdaı áıeldí qatty kúızelíske túsírdí.
Atalǵan patologıyany hırurgıyalyq jolmen alyp tastau qalyptasqan tájírıbe bolǵanyna qaramastan, auruhananyń gınekolog dárígerlerí endovaskulyarlyq hırurg, rentgen-endovaskulyarlyq hırurgıya jáne kardıologıya bólímíníń meńgerushísí Narınbaev Askar Salımovıchpen bírlese otyryp, kezeń-kezeńímen júrgízíletín taktıkany - jatyr arterıyalaryn embolızatsıyalau (JAE) ádísín tańdady. Būl shaǵyn ınvazıvtí tásíl nauqastyń jatyryn jáne reproduktıvtík densaulyǵyn saqtauǵa múmkíndík berdí.
Protsedura sáttí óttí: mıomany qorektendíretín arterıyalarǵa jíńíshke kateter arqyly arnaıy mıkrobólshekter engízílíp, ísíkke baratyn qan aǵymy toqtatyldy. Uaqyt óte kele mıomatozdyq túıín aıtarlyqtaı kíshíreıíp, sońǵy ultradybystyq zertteu deregí boıynsha onyń kólemí 1,5×1,0 sm-ge deıín azaıǵan. Yaǵnı ísík derlík joıyldy. Nauqas auyr otany bastan ótkermeı, tez qalpyna kelíp, qalypty ómír saltyna qaıta oraldy. Būl jetístík patsıenttíń dárígerlerge degen senímí men búkíl medıtsınalyq personaldyń, sonyń íshínde otadan keıíngí kezeńde sapaly kútím kórsetken gınekologıya bólímíníń úılesímdí kásíbı eńbegíníń nátıjesí boldy.
Askar Narınbaev būl ádíske qatysty bylaı dep túsíndírdí:
"Jatyr arterıyalaryn embolızatsıyalau - dástúrlí hırurgıyalyq alyp tastauǵa balama bolyp sanalatyn zamanauı shaǵyn ınvazıvtí protsedura. Mıoma - jatyrdyń būlshyqet qabatynda damıtyn qatersíz ísík. San nemese káríjílík arterıyasy arqyly engízílgen kateter arqyly embolalar jíberíledí, olar túıíndí qorektendíretín qan aǵymyn bógeıdí. Sonyń nátıjesínde ísík kíshíreıíp, qan ketu men auyrsynu belgílerí joıylady, al jatyr tolyq saqtalady. Protsedura shamamen 30 mınutqa sozylady, jergílíktí jansyzdandyrumen júrgízíledí, qalpyna kelu uaqyty qysqa, al áserí bírtíndep baıqalady. JAE-dan keıín uaqytsha tartatyn auyrsynu, dene qyzuynyń sál kóteríluí nemese bólíníster boluy múmkín - būl qalypty jaǵdaı, olar auyrsynudy basatyn dáríníń kómegímen ekí apta íshínde basylady. Eń basty nátıje - aǵzanyń saqtaluy jáne etekkír tsıklíníń qalpyna keluí".
Sońynda Tatyana rızashylyǵyn bíldíríp:
"Eńbegíńíz, qamqorlyǵyńyz jáne áıelderge úmít pen tolyqqandy ómír súru múmkíndígín syılaǵanyńyz úshín shyn júrekten alǵys aıtamyn! Askar Salımovıch mıomany qorektendíretín barlyq arterıyany asa dáldíkpen jauyp shyqty, búgínde ísík derlík joǵaldy. Osyndaı bílíktí mamanmen jolyqtyrǵan taǵdyryma rızamyn", - dedí.