Coldplay konsertinde bas dırektor men áriptesiniń vıdeosyn túsirgen áıel odan qandaı tabys tapqanyn aıtty, dep habarlaıdy aqshamnews.kz UNILAD.com saıtyna silteme jasap.
Astronomer kompanıasynyń bas dırektory Endı Baıron men onyń áriptesi Krıstın Kebottyń Coldplay konserti kezinde qushaqtasyp turǵan sátin vıdeoǵa túsirip alǵan Greıs Sprınger bul rolıkten eshqandaı tabys tappaǵanyn málimdedi.
Ol bul týraly This Morning baǵdarlamasyna qatysyp, júrgizýshiler Dermot O’Lırı men Elıson Hammondqa bergen suhbatynda aıtty.
«Men bul vıdeodan da, onyń qaralymdarynan da aqsha tappadym. Sebebi ol monetızasıaǵa qosylmaǵan», – dedi ol.
Oqıǵa Foksboro qalasyndaǵy Gillette stadıonynda Coldplay tobynyń konserti kezinde bolǵan. Bul sát 50 myń kórermenniń kóz aldynda ekranǵa shyqqan. Qushaqtasý jelide úlken talqyǵa túsip, daýly máselege aınaldy. Sebebi Endı Baıron basqa áıelge – Megan Kerrıgan Baıronǵa úılengen.
Coldplay tobynyń vokalısi Krıs Martın bul jaǵdaıǵa ázilmen:
«Bular ne ǵashyq, ne óte uıalshaq adamdar», – dep sıpattady.
Greıs Sprınger bastapqyda ekrannan ózin kórgisi kelgenin moıyndady:
«Men tek sol sátti túsirip jatqan edim. Ol kezde asa mán bermedim, biraq keıin bári osy vıdeony talqylap jatqanyn ańǵardym», – dedi ol.
Keıin vıdeony dostarymen qaıta kórgende, bul kórinis syrt kózge kúmán týdyratynyn túsingen. Jýrnalıser qoıǵan «Ókinesiz be?» degen suraqqa ol Baıronnyń áıeli men otbasyna janashyrlyqpen qaraıtynyn, biraq:
«Muny tek men ǵana túsirgen joqpyn. Men túsirmesem, basqa bireý túsirer edi», – dep jaýap berdi.
Jelide jarıalanǵan vıdeodan keıin, Astronomer kompanıasy ishki tekserý júrgizip, eki qyzmetker de jumystan ýaqytsha shettetildi. Keıin Endı Baıron otstavkaǵa ketti. Kompanıa málimdemesinde uıym basshylyǵynyń joǵary etıkalyq standarttarǵa saı jumys isteýi mindet ekeni aıtylǵan. SEO kompanıasynyń ýaqytsha bas dırektor qyzmetin kompanıanyń negizin qalaýshylardyń biri – Pıt DeDjoı atqarady.