Almatyda ár kezeńde salynǵan ınjenerlik jelilerdiń kúrdeli júıesi qalyptasqan. Bul júıe turaqty túrde damytýdy jáne jańartýdy talap etedi. Bul týraly Ortalyq komýnıkasıalar qyzmetiniń alańynda ótken brıfıń barysynda Almaty qalasynyń ákimi Darhan Satybaldy málimdedi.
Ákimniń aıtýynsha, 2026 jyldyń sońyna deıin "Aqsaı", "Nurly Taý" jáne "Barlyq" sý alý qurylystarynyń, sondaı-aq 460 shaqyrym sý qubyry jelileriniń qurylysy aıaqtalady. Bul sharalar qaladaǵy 232 myń turǵyndy turaqty aýyzsýmen qamtamasyz etýge múmkindik beredi. Kelesi jyly uzyndyǵy 19 shaqyrym bolatyn úlken dıametrli kolektor, sondaı-aq qalanyń ońtústik, ortalyq jáne shyǵys bólikterinen sarqyndy sýlardy aǵyzýǵa arnalǵan jalpy uzyndyǵy 33 shaqyrym bolatyn 3 káriz kolektory salynady. Uzyndyǵy 30 shaqyrymnan asatyn jańa Batys kolektory Almatynyń batys bóligin jáne oblysqa irgeles aýmaqtardy qamtıdy.
"Energetıka salasynda Naýryzbaı, Alataý jáne Medeý aýdandarynda ıesiz qalǵan 147 shaqyrym jelini qaıta jańǵyrtý josparlanyp otyr. Batys jylý keshenin keńeıtý jáne qýaty 100 MVt bolatyn eki qazandyq agregatty ornatý qaladaǵy 250 myń turǵynnyń jylýmen qamtylýyn jaqsartýǵa múmkindik beredi. Sondaı-aq "Shyǵys qaqpasy" jáne "Kirpish" 110 kV qosalqy stansıalaryn salý qalanyń shyǵys bóligindegi keleshegi bar aýdandardy senimdi elektr qýatymen qamtamasyz etedi. Jalpy jyl saıyn keminde 130 shaqyrym ınjenerlik jelini jańartý kózdelgen. Onyń ishinde: sý qubyry jelileri – 35 shaqyrym, káriz júıesi – 10 shaqyrym, jylý jelileri – 39 shaqyrym, elektr jelileri – 45 shaqyrym", – dedi Darhan Satybaldy.