Qys mezgilinde kóktaıǵaq saldarynan taıyp qulap, jaraqat alatyndar kóbeıedi. Sondyqtan qarapaıym saqtyq erejelerin saqtaý – óz qaýipsizdigińizdi qorǵaýdyń eń tıimdi joly. №7 qalalyq aýrýhanasynyń travmatolog dárigeri Jasulan Arǵynbaev kóktaıǵaq kezinde nazar aýdaratyn negizgi keńesterdi bólisti, - dep habarlaıdy aqshamnews.kz tilshisi.
№7 qalalyq aýrýhanasynyń travmatolog dárigeri Jasulan Arǵynbaev
Durys aıaqkıim – qaýipsizdiktiń basty sharty
Maman eń aldymen yńǵaıly, tabany taımaıtyn aıaq kıim tańdaýdy usynady. Tabany kedir-budyr, jumsaq rezeńkeli aıaq kıim syrǵanaý qaýpin azaıtady.
Qalaı júrý kerek?
Kóktaıǵaqta júrý tehnıkasy da mańyzdy:
- Asyqpaı júrińiz;
- Tabandy tolyq basyńyz, aıaqtyń ushymen júrýden saqtanyńyz;
- Eki qoldy bos ustańyz (qoldy qaltaǵa salmańyz);
- Deneńizdi sál alǵa eńkeıtip júrińiz – tepe-teńdik saqtaýǵa kómektesedi.
Taıyp qulap bara jatsańyz ne istegen durys?
Dárigerdiń aıtýynsha, qulap bara jatqanda jaraqatty jeńildetýdiń de tásili bar.
"Taıyp qulaǵan jaǵdaıda jaraqat aýyr bolmaýy úshin bir jaq janyńyzben qulaýǵa tyrysyńyz. Eń bastysy – sabyr saqtap, birden atyp turyp ketpeý kerek", – deıdi travmatolog Jasulan Arǵynbaev.
Qulaǵannan keıin:
- aldymen qol-aıaq býyndaryńyzdy qımyldatyp, qatty aýyrsyný joq-joǵyn tekserińiz
- bári durys ekenine kóz jetkizgennen keıin ǵana jaılap turyńyz;
- syný belgileri (qatty aýyrsyný, isiný, qozǵaltqanda kúsheıý, aıaq-qoldyń qalyptan tys qısaıýy) baıqalsa, dereý 103 nómirine habarlasyńyz.