Ortalyq komýnıkasıalar qyzmeti alańynda ótken brıfıń barysynda Almaty qalasynyń ákimi Darhan Satybaldy megapolıste jaıly qalalyq orta qalyptastyrý jáne ınjenerlik ınfraqurylymdy jańartý baǵytynda júıeli sharalar júzege asyrylyp jatqanyn aıtty.
Ákimniń aıtýynsha, 2025 jyly Almatyda jalpy uzyndyǵy 49 shaqyrym bolatyn 11 kóshede keshendi kóriktendirý jumystary aıaqtaldy. Qazirgi ýaqytta Dostyq dańǵylynyń ál-Farabı dańǵylynan Abaı dańǵylyna deıingi bóligi, sondaı-aq Pýshkın kóshesiniń Gogol kóshesinen Raıymbek batyr dańǵylyna deıingi aralyǵynda kóriktendirý jumystary jalǵasyp jatyr.
Syrtqy jaryqtandyrý júıesin damytý men jańǵyrtýǵa erekshe nazar aýdarylyp otyr. Qabyldanyp jatqan sharalar buryn jaryqtandyrylmaǵan 1 100-den astam aýmaqty qamtydy.
Baǵdarlama aıasynda 12 myńnan astam jańa jaryq shamy ornatylyp, sondaı-aq 20 myńnan asa eski jaryqtandyrý quraldary aýystyrylyp jatyr. Osylaısha, jyl sońyna deıin Almaty qalasynda 32 myńnan astam jaryq shamy ornatylady.
Sonymen qatar, 400 nysanda sándik-sáýlettik jaryqtandyrý júıeleri engizilýde. Qabyldanǵan keshendi sharalardyń nátıjesinde qala tolyqtaı sapaly syrtqy jaryqpen qamtamasyz etiledi. Bul baǵyttaǵy jumystar 2026 jyly da jalǵasady.
Sondaı-aq, qala ákimi Almaty qalasynda sýmen jabdyqtaý jáne káriz júıelerin jańǵyrtý jumystary júrgizilip jatqanyn málimdedi. 2025 jyly 330 shaqyrym jańa sý qubyry jelisi salyndy, 60 shaqyrym qoldanystaǵy jeli jańartyldy. Sý resýrsyn tıimdi paıdalaný maqsatynda jeke esepteý quraldaryn ornatý jumystary kúsheıtildi: jyl basynan beri 84,8 myń sýyq sý eseptegishi ornatylyp, qurylǵylarmen jabdyqtalý deńgeıi 67 %-dan 87 %-ǵa deıin ósti. Bul sý resýrstaryn tıimdi basqarý men shyǵyndy azaıtýǵa múmkindik berip otyr.
Sonymen qatar jylý, elektr jáne gazben jabdyqtaý ınfraqurylymyn jańartý aıasynda 39 shaqyrym jylý jelisi qaıta jańǵyrtylyp, 17 qazandyq jańartyldy. Elektrmen jabdyqtaý salasynda 221 shaqyrym jeli qaıta jańǵyrtyldy, onyń ishinde 115 shaqyrymy "AJK" AQ-nyń ınvestısıalyq baǵdarlamasy esebinen iske asyryldy. Gazben jabdyqtaý baǵytynda 6,5 shaqyrym jańa jeli paıdalanýǵa berilip, Túrksib aýdanynda 4 shaqyrymnan astam magıstraldyq gaz qubyryn salý jumystary bastaldy", – dedi Darhan Satybaldy.